महाराष्ट्र 24 | विशेष प्रतिनिधी | दि. १५ फेब्रुवारी २०२६ || अमेरिका–इराण तणाव शिगेला पोहोचलेला असताना आता थेट भेटीची शक्यता निर्माण झाली आहे. अमेरिकेचे राष्ट्राध्यक्ष Donald Trump आणि इराणचे सर्वोच्च नेते Ali Khamenei यांच्यात भेट होऊ शकते, असे संकेत अमेरिकेचे परराष्ट्र मंत्री Marco Rubio यांनी दिले. “अमेरिका अजूनही इराणबरोबरचा प्रश्न चर्चेद्वारे सोडवू इच्छिते. संधी मिळाली तर राष्ट्राध्यक्ष ट्रम्प कोणालाही भेटण्यास तयार आहेत,” असे स्पष्ट वक्तव्य रुबियो यांनी केले. काही दिवसांपूर्वीच ट्रम्प यांनी इराणमध्ये सत्ताबदल हा सर्वोत्तम पर्याय ठरेल, असे विधान करून खळबळ उडवली होती. त्यामुळे एका बाजूला कठोर भूमिका आणि दुसऱ्या बाजूला संवादाची तयारी, अशी अमेरिकेची दुहेरी रणनीती दिसून येत आहे.
ब्लूमबर्गशी संवाद साधताना रुबियो म्हणाले, “मी अशा राष्ट्राध्यक्षांच्या नेतृत्वाखाली काम करतो जे जागतिक वाद सोडवण्यासाठी थेट संपर्कावर विश्वास ठेवतात. जर खामेनी उद्या भेटीची तयारी दर्शवतील, तर ट्रम्प त्यांना भेटतील.” या विधानामुळे आंतरराष्ट्रीय राजकारणात चर्चेला उधाण आले आहे. गेल्या काही महिन्यांत दोन्ही देशांमध्ये आरोप-प्रत्यारोपांची मालिका सुरू होती. ट्रम्प यांनी वारंवार इराणच्या सत्तेविरोधात कठोर इशारे दिले, तर खामेनी यांनीही त्यांना जशास तसे उत्तर दिले. अशा पार्श्वभूमीवर संवादाची शक्यता ही मोठी राजनैतिक घडामोड मानली जाते.
दरम्यान, अमेरिकेने जगातील सर्वात मोठी विमानवाहू युद्धनौका USS Gerald R. Ford मध्य पूर्वेत तैनात केली आहे. या पावलामुळे अमेरिकेची लष्करी ताकद त्या भागात अधिक बळकट झाली आहे. ट्रम्प यांनी इशारा देताना म्हटले होते की, “४७ वर्षे फक्त चर्चा चालू आहेत; पण जर नवीन करार झाला नाही तर अमेरिका सज्ज आहे.” त्यामुळे लष्करी दबाव आणि राजनैतिक संवाद यांचा समतोल साधण्याचा प्रयत्न सुरू असल्याचे दिसते. आता खरोखरच ट्रम्प आणि खामेनी समोरासमोर येणार का, याकडे जगाचे लक्ष लागले आहे.