Pune Traffic Update : 🚦 पुणेकरांनो सावधान! आज शहरात मोठी वाहतूक कोंडी; ‘हे’ पर्यायी मार्ग वापरा

महाराष्ट्र 24 | विशेष प्रतिनिधी | दि. १९ फेब्रुवारी २०२६ || आज Pune शहरात छत्रपती शिवाजी महाराज यांच्या ३९६ व्या जयंतीनिमित्त भव्य शोभायात्रा आणि मिरवणुका काढण्यात येत आहेत. त्यामुळे मध्यवर्ती भागातील वाहतुकीत मोठे बदल करण्यात आले आहेत. सकाळी ७ वाजल्यापासून गर्दी संपेपर्यंत लक्ष्मी रस्ता, छत्रपती शिवाजी महाराज रस्ता, बाजीराव रस्ता, नेहरू रस्ता, कुमठेकर रस्ता आणि केळकर रस्ता परिसरात वाहतूक वळविण्यात येणार आहे. स्वारगेटकडे जाणाऱ्या वाहनचालकांनी जंगली महाराज रस्ता – बर्वे चौक – टिळक रस्ता हा पर्यायी मार्ग वापरावा, असे आवाहन करण्यात आले आहे. गणेश रस्ता आणि जिजामाता चौकातील वाहतूकही वळविण्यात आली असून नागरिकांनी दारूवाला पूल मार्गाचा वापर करावा.

पोलीस प्रशासनाने स्पष्ट केले आहे की, मध्यवर्ती भागात मोठ्या प्रमाणात नागरिकांची उपस्थिती अपेक्षित आहे. त्यामुळे मुख्य रस्त्यांवर वाहतूक कोंडी होण्याची शक्यता आहे. आप्पा बळवंत चौकाकडे जाणारी वाहतूक केळकर रस्त्याऐवजी पर्यायी मार्गाने वळविण्यात आली आहे, तर लक्ष्मी रस्त्यातील वाहनेही दुसऱ्या मार्गाने सोडली जात आहेत. आवश्यकतेनुसार वाहतूक बंद किंवा वळविण्याचे अधिकार स्थानिक वाहतूक पोलिसांकडे असतील. त्यामुळे वाहनचालकांनी संयम बाळगून पोलिसांच्या सूचनांचे पालन करावे, असे आवाहन करण्यात आले आहे.

दरम्यान, हिंजवडी परिसरातही वाहतुकीत महत्त्वाचे बदल करण्यात आले आहेत. कस्तुरी चौक ते छत्रपती श्री शिवाजी महाराज चौक हा रस्ता सर्व प्रकारच्या वाहनांसाठी बंद ठेवण्यात आला आहे. मारुंजी वाय जंक्शनकडून येणाऱ्या वाहनांना कस्तुरी चौकातून उजवीकडे वळून विनोदे वस्ती मार्गे इंडियन ऑईल चौकाकडे जावे लागणार आहे. तसेच मेझा-९ चौकाकडून येणाऱ्या वाहनांसाठीही मार्ग बदलण्यात आला आहे. काही ठिकाणी दोन लेनपैकी एक लेन बंद ठेवून वाहतूक एकाच बाजूने सुरू राहणार आहे. त्यामुळे आयटी पार्क परिसरात कामानिमित्त जाणाऱ्यांनी वेळेआधी घराबाहेर पडणे आणि पर्यायी मार्गांचा वापर करणे हितावह ठरणार आहे.