✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ०७ मार्च २०२६ ।। इस्रायल-अमेरिका आणि इराण यांच्यात वाढलेल्या युद्धजन्य तणावाचा थेट परिणाम आता आंतरराष्ट्रीय विमान प्रवासावर दिसू लागला आहे. मध्यपूर्वेतील परिस्थिती गंभीर बनल्यामुळे अनेक हवाई मार्गांवर निर्बंध आले असून त्याचा परिणाम विमान कंपन्यांच्या वेळापत्रकावर आणि तिकीट दरांवर झाला आहे. गेल्या आठवडाभरात भारतातून युरोपला जाणाऱ्या विमानांच्या भाड्यात ४० टक्क्यांहून अधिक वाढ झाली आहे. तर दुबई मार्गावरील तिकीट दर तब्बल ६० ते ८० टक्क्यांनी वाढल्याचे समोर आले आहे. त्यामुळे परदेश प्रवासाची योजना आखणाऱ्या प्रवाशांना अचानक वाढलेल्या खर्चाचा मोठा फटका बसत आहे. ट्रॅव्हल कंपन्यांच्या माहितीनुसार, पुढील १५ दिवसांत प्रवासाचे बुकिंग करणाऱ्यांना ही भाडेवाढ अधिक जाणवणार आहे.
ट्रॅव्हल कंपनी Pickyourtrail च्या आकडेवारीनुसार, मध्यपूर्वेतील तणावामुळे विमान उड्डाणांची संख्या कमी झाल्याने भारत-दुबई कॉरिडॉरवर मोठा परिणाम झाला आहे. या मार्गावरील एकेरी प्रवासाचे तिकीट काही ठिकाणी ८० टक्क्यांपर्यंत वाढले आहे. गेल्या काही दिवसांत अनेक उड्डाणे रद्द करण्यात आली असून त्यापैकी ५० ते ६५ टक्के उड्डाणे दुबई मार्गावरील असल्याचे सांगितले जाते. युरोपकडे जाणाऱ्या प्रवाशांनाही याचा मोठा फटका बसला आहे. जर्मनी आणि पोर्तुगालसारख्या देशांसाठीचे तिकीट दर झपाट्याने वाढले आहेत. उदाहरणार्थ, दिल्ली-फ्रँकफर्ट मार्गावरील इकॉनॉमी क्लासचे सर्वात स्वस्त तिकीट सध्या दीड लाख रुपयांच्या आसपास पोहोचले आहे. अनेक उड्डाणांमध्ये पुढील काही दिवसांचे बुकिंग आधीच पूर्ण झाले असल्याने प्रवाशांना पर्याय कमी पडत आहेत.
हवाई वाहतूक क्षेत्रातील तज्ज्ञांच्या मते, या भाडेवाढीमागे काही महत्त्वाची कारणे आहेत. मध्यपूर्वेतील काही हवाई क्षेत्रे बंद झाल्यामुळे विमानांना लांब पर्यायी मार्गाने प्रवास करावा लागत आहे. त्यामुळे इंधनाचा खर्च वाढत आहे आणि उड्डाणाचा कालावधीही अधिक होत आहे. त्याचबरोबर युद्धजन्य परिस्थितीमुळे विमान विम्याचा खर्च वाढला आहे. उड्डाणांची संख्या कमी आणि प्रवाशांची मागणी जास्त असल्याने तिकीट दर झपाट्याने वाढत असल्याचे तज्ज्ञांचे मत आहे. हवाई वेळापत्रकात वारंवार बदल होत असल्याने काही मार्गांवरील टूर पॅकेजेसही महागली आहेत, असे IATO चे अध्यक्ष रवी गोसाईं यांनी सांगितले. परिणामी, मध्यपूर्वेतील तणावाचा परिणाम आता केवळ राजकारण किंवा अर्थव्यवस्थेपुरता मर्यादित न राहता सामान्य प्रवाशांच्या खिशावरही जाणवू लागला आहे. ✈️