✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २५ मार्च २०२६ ।।राज्यात सध्या हवामानाचा दुहेरी खेळ पाहायला मिळत आहे. भारतीय हवामान विभाग च्या अंदाजानुसार पुढील २४ तासांत मुंबई आणि कोकण पट्ट्यात दुपारच्या वेळेत कडक उन्हाचा तडाखा वाढणार असून उकाडा आणि आर्द्रता यामुळे नागरिकांना अधिक त्रास होण्याची शक्यता आहे. त्यामुळे यलो अलर्ट जारी करण्यात आला असून, भर दुपारी बाहेर पडताना काळजी घेण्याचा सल्ला देण्यात आला आहे. त्याचवेळी विदर्भ भागात तापमानात वाढ होत असताना काही ठिकाणी वादळी पावसाचाही इशारा कायम आहे.
दक्षिण मध्य महाराष्ट्र आणि मराठवाडा येथे मेघगर्जनेसह पावसाची शक्यता व्यक्त करण्यात आली आहे. मध्य महाराष्ट्रापासून तामिळनाडू आणि कर्नाटक पर्यंत कमी दाबाचा पट्टा आणि चक्राकार वाऱ्यांची स्थिती निर्माण झाल्याने हवामानात अचानक बदल होत आहेत. त्यामुळे उन्हाळ्यातही पावसाच्या सरी कोसळण्याची शक्यता कायम आहे.
दरम्यान, देशपातळीवरही हवामानाचा मोठा बदल दिसून येत आहे. भारतातील तब्बल १२ राज्यांमध्ये वादळ आणि पावसाचा इशारा देण्यात आला आहे. यामध्ये उत्तर प्रदेश, बिहार, पंजाब यांसह उत्तर आणि पूर्व भारतातील अनेक राज्यांचा समावेश आहे. काही भागांत वाऱ्याचा वेग ताशी ७५ किमीपर्यंत पोहोचण्याची शक्यता असून झाडे उन्मळून पडण्याचा धोका व्यक्त करण्यात आला आहे.
उत्तर-पश्चिम भारतात दोन पश्चिमी झंझावात सक्रिय झाल्यामुळे दिल्ली, राजस्थान, हरियाणा, हिमाचल प्रदेश आणि उत्तराखंड येथे पावसाचा जोर वाढणार आहे. तर पूर्व भारतातील झारखंड, पश्चिम बंगाल, सिक्कीम आणि ओडिशा येथे वादळी पावसासह गारपीटीची शक्यता वर्तवण्यात आली आहे.
एकूणच, मार्च महिन्याच्या अखेरीस राज्यासह देशभरात हवामानाचा अस्थिर नमुना दिसून येत असून नागरिकांनी उष्णता आणि वादळी पावसापासून बचावासाठी आवश्यक ती खबरदारी घेण्याचे आवाहन करण्यात आले आहे.