💊 महागाईचा नवा फटका! LPG-पेट्रोलनंतर आता औषधंही महाग; १ एप्रिलपासून ‘आरोग्य’ महागणार!

Spread the love

✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २७ मार्च २०२६ ।। Medicine Price Hike: सर्वसामान्यांच्या खिशाला आधीच महागाईची झळ बसलेली असताना, आता आणखी एक मोठा धक्का बसणार आहे. १ एप्रिल २०२६ पासून ताप, वेदनाशामक आणि अँटीबायोटिक्ससारख्या अत्यावश्यक औषधांच्या किमती वाढणार असल्याने नागरिकांची चिंता वाढली आहे. राष्ट्रीय औषध मूल्य निर्धारण प्राधिकरण ने १००० हून अधिक औषधांच्या दरवाढीस मंजुरी दिली असून, ही वाढ घाऊक किंमत निर्देशांकावर आधारित आहे.

या निर्णयानुसार औषधांच्या किमतीत सुमारे ०.६% वाढ होणार आहे. ऐकायला ही वाढ लहान वाटली तरी रोजच्या वापरातील औषधांवर याचा थेट परिणाम होणार आहे. पॅरासिटामॉल, एझिथ्रोमायसिन आणि सिप्रोफ्लॉक्सासिन यांसारखी औषधं महागणार आहेत. याशिवाय अ‍ॅनिमिया, जीवनसत्त्वे, स्टिरॉइड्स आणि कोविडसंबंधित औषधांनाही दरवाढीचा फटका बसणार आहे. म्हणजेच, साध्या सर्दी-तापापासून गंभीर आजारांपर्यंत प्रत्येक स्तरावर खर्च वाढणार हे निश्चित!

दरवाढीमागे जागतिक कारणंही तितकीच गंभीर आहेत. इराण-इस्रायल संघर्षामुळे औषधनिर्मितीसाठी लागणाऱ्या कच्च्या मालाच्या किमतीत मोठी वाढ झाली आहे. ‘API’ (Active Pharmaceutical Ingredients), ग्लिसरीन, तसेच पॅकेजिंगसाठी लागणारे ॲल्युमिनियम आणि पीव्हीसी यांचे दर ३० ते ६४% पर्यंत वाढले आहेत. त्यामुळे कंपन्यांवरचा खर्च वाढल्याने दरवाढ अपरिहार्य ठरल्याचे सांगितले जाते.

एकूणच, पेट्रोल-गॅसनंतर आता औषधांचाही खर्च वाढणार असल्याने सामान्य माणसाच्या बजेटचा ताळमेळ बिघडण्याची शक्यता आहे. प्रश्न फक्त एवढाच—महागाईचा हा सिलसिला इथे थांबणार की अजून नवे धक्के बसणार? 😟