✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २८ मार्च २०२६ ।। LPG Crisis : मध्यपूर्वेतील तणावाच्या पार्श्वभूमीवर देशात एलपीजी, पेट्रोल आणि डिझेल तुटवड्याच्या अफवा वेगाने पसरत असताना केंद्र सरकारने अखेर स्पष्ट भूमिका मांडली आहे. India मध्ये घरगुती किंवा व्यावसायिक एलपीजीचा कोणताही तुटवडा नसल्याचे सरकारने ठामपणे सांगितले आहे. उलट, पुढील दोन महिन्यांसाठी पुरेसा साठा उपलब्ध असून पुरवठा साखळी सुरळीत सुरू असल्याची माहिती देण्यात आली आहे. मात्र, सोशल मीडियावर पसरलेल्या अफवांमुळे नागरिकांमध्ये भीतीचे वातावरण निर्माण झाले असून पेट्रोल पंप आणि गॅस एजन्सींवर अनावश्यक गर्दी होत आहे. “साठा संपणार” या भीतीपोटी लोक जास्तीचा साठा करून ठेवत असल्याने परिस्थिती कृत्रिमरीत्या ताणली जात असल्याचे चित्र दिसत आहे.
सरकारच्या माहितीनुसार, व्यावसायिक एलपीजीचा पुरवठा सुमारे ७० टक्क्यांपर्यंत पूर्ववत झाला आहे आणि आतापर्यंत ३०,००० टन एलपीजीचे वितरण करण्यात आले आहे. याशिवाय पाच किलोचे सुमारे ३०,००० सिलिंडरही ग्राहकांना देण्यात आले आहेत. पेट्रोल आणि डिझेलबाबतही परिस्थिती स्थिर असून देशभरातील सुमारे १ लाख पेट्रोल पंपांपैकी बहुतांश पंपांवर पुरेसा साठा उपलब्ध आहे. सार्वजनिक क्षेत्रातील कंपन्यांकडे (PSUs) ९१ हजारांहून अधिक पंप असून तेथून पुरवठा सुरळीत सुरू आहे. त्यामुळे प्रत्यक्षात कोणतीही कमतरता नसताना केवळ अफवांमुळे निर्माण झालेली घबराटच या रांगांचे मुख्य कारण असल्याचे स्पष्ट झाले आहे.
दरम्यान, सरकारने नागरिकांना स्पष्ट आवाहन केले आहे की, कोणत्याही अप्रमाणित बातम्यांवर विश्वास ठेवू नये आणि आवश्यक तेवढाच इंधन किंवा गॅस खरेदी करावा. मध्यपूर्वेतील संघर्षामुळे जागतिक बाजारात कच्च्या तेलाच्या किमतीत चढ-उतार होत असले तरी देशांतर्गत पुरवठ्यावर त्याचा तात्काळ परिणाम झालेला नाही. तसेच लॉकडाऊनबाबत पसरत असलेल्या अफवांनाही सरकारने पूर्णविराम दिला असून असा कोणताही निर्णय विचाराधीन नसल्याचे स्पष्ट केले आहे. त्यामुळे सध्या “तुटवडा” नाही, तर “अफवांचा ताण” आहे, हेच या संपूर्ण परिस्थितीचे खरे वास्तव असल्याचे स्पष्ट झाले आहे.