Gold Rate : 💰 सोन्याची घसरण की खरेदीची संधी? चांदी तर थेट ‘धडाम’!

✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ३० मार्च २०२६ ।। लग्नसराईच्या मोसमात सोन्याच्या दुकानात गर्दी असतेच, पण यंदा ग्राहकांच्या चेहऱ्यावर वेगळाच आनंद दिसतोय. कारण, जे सोनं काही दिवसांपूर्वी ‘हाताबाहेर’ गेल्यासारखं वाटत होतं, तेच आता थोडं परवडणारं झालं आहे. मागील दहा दिवसांत सोन्याच्या किमतीत तब्बल १३,४९४ रुपयांची घसरण झाली आहे, तर चांदीने तर थेट ३१ हजार रुपयांनी ‘उडी’ मारत उलट दिशेने धाव घेतली आहे. Indian Bullion and Jewellers Association च्या आकडेवारीनुसार हा बदल नोंदवला गेला आहे. त्यामुळे गुंतवणूकदारांसाठी ही ‘गोल्डन चान्स’ की अजून थांबायचं, हा प्रश्न आता चर्चेचा विषय बनला आहे.

आज मुंबईमध्ये २४ कॅरेट सोन्याचा दर प्रति १० ग्रॅम सुमारे १,४८,०९० रुपये आहे, तर २२ कॅरेट सोनं १,३५,७५० रुपयांवर व्यवहार करत आहे. काही दिवसांपूर्वीच १.५६ लाखांचा टप्पा ओलांडलेलं सोनं आता खाली आलंय, म्हणजेच बाजारातील अस्थिरता किती तीव्र आहे हे स्पष्ट होतं. चांदीच्या बाबतीत तर परिस्थिती आणखी नाट्यमय आहे—किलोमागे ३० हजारांहून अधिक घसरण म्हणजे गुंतवणूकदारांसाठी मोठा धक्का आणि खरेदीदारांसाठी मोठी संधी. या चढ-उतारामागे जागतिक घडामोडी, युद्धजन्य परिस्थिती आणि गुंतवणूकदारांची मानसिकता मोठ्या प्रमाणात कारणीभूत ठरत आहे.

पण इथेच खरी गोष्ट लक्षात घ्यायला हवी—सोनं कधीच स्थिर नसतं, ते नेहमीच ‘भावनांवर’ चालतं. कधी भीती वाढली की सोनं महाग होतं, आणि परिस्थिती थोडी स्थिर झाली की ते घसरतं. त्यामुळे आजची घसरण म्हणजे उद्याची खात्रीशीर कमाई असं समजणं धोकादायक ठरू शकतं. तज्ज्ञ सांगतात, गुंतवणूक करताना एकाच ठिकाणी पैसा न गुंतवता विविध पर्यायांचा विचार करावा. म्हणजेच, सोनं घ्या—पण समजून घ्या ! कारण बाजारातली ही घसरण जशी संधी आहे, तशीच ती सावधगिरीची घंटाही आहे.