✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ३१ मार्च २०२६ ।। ऐन उन्हाळ्यात महाराष्ट्रावर अवकाळी पावसाने अचानक हल्ला चढवला असून राज्यातील अनेक जिल्ह्यांमध्ये ढगाळ वातावरणानंतर जोरदार सरी आणि गारपीट सुरू झाली आहे. उकाड्याने हैराण झालेल्या नागरिकांना क्षणिक दिलासा मिळाला असला, तरी हवामान खात्याच्या पुढील चार दिवसांच्या अंदाजाने मात्र चिंता वाढवली आहे. नाशिक, अहिल्यानगर, सोलापूर, बीड, लातूर, धाराशिव, कोल्हापूर आणि सांगली या जिल्ह्यांना वादळी पावसाचा इशारा देण्यात आला आहे. त्याचबरोबर पुणे, सातारा, जळगाव, छत्रपती संभाजीनगर, नांदेड, धुळे, बुलढाणा, परभणी, चंद्रपूर, अकोला, गडचिरोली, यवतमाळ आणि हिंगोली या भागांतही अवकाळी पावसाची शक्यता वर्तवण्यात आली आहे.
उद्या मंगळवारी परिस्थिती आणखी गंभीर होण्याची शक्यता व्यक्त करण्यात आली आहे. पुणे, सातारा, नाशिक, जालना, सांगली, सोलापूर, बीड आणि परभणीसह अनेक जिल्ह्यांमध्ये गारपीटीचा अंदाज आहे, तर विदर्भ आणि कोकणातील अनेक भागांत वादळी वाऱ्यासह पावसाचा तडाखा बसू शकतो. नागपूर, वर्धा, भंडारा, गोंदिया, चंद्रपूर, गडचिरोली, रत्नागिरी, रायगड आणि ठाणे या जिल्ह्यांमध्येही हवामान बिघडण्याची शक्यता आहे. त्यामुळे प्रशासन आणि नागरिक दोघांनाही सतर्क राहण्याचा इशारा देण्यात आला आहे.
दरम्यान, या अवकाळी पावसामुळे शेतकऱ्यांचे मोठे नुकसान होण्याची भीती व्यक्त केली जात आहे. जळगावमध्ये केळी पिकावर परिणाम होण्याची शक्यता आहे, तर पुणे जिल्ह्यातील जुन्नर परिसरातील प्रसिद्ध शिवनेरी हापूस आंब्याला मोठा फटका बसण्याची चिन्हे आहेत. भाजीपाला, कांदा, बटाटा यांसारख्या पिकांनाही या बदलत्या हवामानाचा फटका बसू शकतो. एकीकडे शहरांना थंडाव्याचा दिलासा मिळत असताना, दुसरीकडे शेतकऱ्यांसाठी ही परिस्थिती चिंतेची ठरत आहे—निसर्गाचा हा अनिश्चित खेळ पुन्हा एकदा डोकेदुखी ठरतो आहे.