✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ३ एप्रिल २०२६ ।। पश्चिम आशियातील युद्ध आता केवळ सीमित संघर्ष राहिलेला नाही, तर तो जागतिक अस्थिरतेचा धगधगता ज्वालामुखी बनला आहे. Donald Trump यांनी इराणमधील करज परिसरातील महत्त्वाचा पूल उद्ध्वस्त झाल्याचा व्हिडिओ शेअर करत जगाला थेट संदेश दिला—“तडजोड करा, नाहीतर परिणाम भयानक असतील.” या एका व्हिडिओने केवळ युद्धाची तीव्रता दाखवली नाही, तर मानसशास्त्रीय दबावाचं शस्त्र किती प्रभावी असू शकतं, हेही स्पष्ट केलं. या हल्ल्यामुळे दळणवळण व्यवस्थेला मोठा फटका बसल्याचं सांगितलं जात असून, इराणच्या अंतर्गत हालचालींवर त्याचा परिणाम होण्याची शक्यता व्यक्त केली जाते. युद्धभूमीवरील स्फोटांइतकाच धक्कादायक हा ‘डिजिटल हल्ला’ ठरला आहे.
दरम्यान, Masoud Pezeshkian यांनी अमेरिकेवर जोरदार पलटवार करत या कारवायांना “मानवतेविरुद्धचा गुन्हा” ठरवलं. पूल उद्ध्वस्त करणं समजण्यासारखं असलं, तरी रुग्णालये आणि वैद्यकीय संस्थांवर हल्ले करणं अमानवी असल्याचं त्यांनी ठणकावलं. दुसरीकडे, इराणने इस्रायल आणि खाडीतील देशांवर क्षेपणास्त्र हल्ले करत “आमची ताकद अजून शाबूत आहे” असा संदेश दिला. त्यामुळे एकीकडे दबाव, तर दुसरीकडे प्रतिकार—या दुहेरी समीकरणात संघर्ष अधिकच तीव्र होताना दिसतोय. जागतिक तेलपुरवठ्यावर याचा थेट परिणाम होत असून, त्याचे पडसाद अर्थव्यवस्थांवर उमटू लागले आहेत.
US President Donald Trump posts on Truth Social, "…It is time for Iran to make a deal before it is too late and there is nothing left of what still could become a great country…" pic.twitter.com/CrmxmVluPU
— ANI (@ANI) April 2, 2026
या सगळ्या पार्श्वभूमीवर Strait of Hormuz हा संघर्षाचा केंद्रबिंदू ठरतो आहे. जगातील जवळपास २० टक्के तेलपुरवठा या मार्गावर अवलंबून असताना, तो बंद होण्याची भीती निर्माण झाली आहे. ब्रिटनसह ३० हून अधिक देश या मार्गासाठी रणनीती आखत असताना, ट्रम्प यांनी “तेल हवं असेल तर पुढे या” असं स्पष्ट सांगत जबाबदारी इतर देशांवर ढकलली आहे. याचवेळी इराणकडून “आमची खरी ताकद अजून लपलेली आहे” असा इशारा दिला जातोय. त्यामुळे युद्ध केवळ गोळ्या-बारूदापुरतं मर्यादित न राहता, ते आता राजकारण, अर्थकारण आणि जागतिक शक्तीसमतोल यांचा गुंतागुंतीचा खेळ बनलं आहे—ज्यात पुढचा डाव कोणाचा भारी पडेल, हेच सगळ्यांना अस्वस्थ करत आहे.