✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २६ एप्रिल २०२६ ।। देशातील घराघरात वापरल्या जाणाऱ्या गॅस सिलिंडरबाबत पुन्हा एकदा नवे नियम लागू होण्याच्या चर्चा रंगल्या आहेत. इंडेन, भारत गॅस आणि एचपी गॅस या प्रमुख कंपन्यांच्या धोरणात बदल होण्याची शक्यता व्यक्त केली जात असून, त्याचा थेट परिणाम सर्वसामान्य ग्राहकांवर होऊ शकतो. विशेषतः मे महिन्याच्या सुरुवातीपासून सिलिंडरच्या दरात तसेच बुकिंगच्या कालावधीत बदल होण्याची शक्यता आहे. सध्या एक सिलिंडर घेतल्यानंतर पुढील बुकिंगसाठी ठराविक दिवसांची अट आहे; मात्र नव्या नियमानुसार हा अवधी वाढवला जाऊ शकतो, अशी चर्चा आहे.
याचबरोबर ओटीपी आधारित डिलिव्हरी प्रणाली अधिक कडकपणे लागू करण्याचा विचार सुरू आहे. गॅस सिलिंडर घरपोच देताना नोंदणीकृत मोबाईल नंबरवर ओटीपी येईल आणि तो दिल्यानंतरच सिलिंडर मिळणार, असा नियम कायमस्वरूपी केला जाऊ शकतो. यामुळे गैरव्यवहाराला आळा बसेल, असा दावा केला जातो. मात्र ज्या ग्राहकांकडे नोंदणीकृत मोबाईल नाही किंवा नेटवर्क समस्या आहे, त्यांना अडचणींचा सामना करावा लागू शकतो. त्यामुळे ग्राहकांनी आपली माहिती अद्ययावत ठेवणे आवश्यक ठरणार आहे.
दरम्यान, आंतरराष्ट्रीय स्तरावर कच्च्या तेलाच्या पुरवठ्यात झालेल्या बदलामुळे भारताच्या एलपीजी धोरणातही मोठे बदल होत आहेत. आधी आखाती देशांवर मोठ्या प्रमाणात अवलंबून असलेला भारत आता अमेरिका, नॉर्वे, कॅनडा, अल्जेरिया आणि रशिया यांसारख्या देशांकडूनही गॅस आयात वाढवत आहे. देशात दररोज लागणाऱ्या सुमारे ८० हजार टन एलपीजीपैकी केवळ ४६ हजार टन उत्पादन होत असल्याने आयात अपरिहार्य ठरते. त्यामुळे जागतिक घडामोडींचा थेट परिणाम सिलिंडरच्या उपलब्धतेवर आणि किमतीवर होणार, हे स्पष्ट आहे.