✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २६ एप्रिल २०२६ ।। देशातील सोन्याच्या बाजारात पुन्हा एकदा अनिश्चिततेचे सावट दाटू लागले आहे. जानेवारीअखेरपासून घसरणीचा कल दाखवणाऱ्या दरांनी आता नव्या दिशेने वळण घेतले असून, गेल्या तीन महिन्यांत मोठ्या चढ-उतारांनी ग्राहकांची चिंता वाढवली आहे. देशांतर्गत बाजारात सोन्याच्या प्रीमियममध्ये लक्षणीय वाढ झाली असून, सरकारकडून संकेत मिळूनही बँकांनी आयात प्रक्रियेत मागे हटल्याने पुरवठा मर्यादित झाला आहे. अक्षय तृतीयेच्या पार्श्वभूमीवर मागणी काहीशी मंदावलेली असतानाही जागतिक बाजारात, विशेषतः चीनमध्ये खरेदी वाढल्याने परिस्थिती अधिक गुंतागुंतीची बनली आहे.
याच आठवड्यात सोन्याच्या प्रीमियमने अडीच महिन्यांतील उच्चांक गाठला आहे. अधिकृत किमतींवर प्रति औंस सुमारे १५ डॉलरपर्यंत अतिरिक्त प्रीमियम द्यावा लागत असल्याचे चित्र आहे. आयात शुल्क आणि करांचा भार वाढत असतानाच बँकांनी आयात थांबवल्याने बाजारात तुटवडा जाणवू लागला आहे. फेब्रुवारीनंतर नफावसुलीमुळे दर काहीसे खाली आले होते; मात्र आंतरराष्ट्रीय तणाव आणि पुरवठ्यातील अडथळ्यांमुळे पुन्हा दरवाढीची चिन्हे दिसत आहेत. विशेषतः पश्चिम आशियातील संघर्षामुळे हवाई मार्गात व्यत्यय आल्याने आयातीवर परिणाम झाल्याची चर्चा आहे.
दरम्यान, या सगळ्या घडामोडींमागे कर धोरणातील अनिश्चितता हे मोठे कारण मानले जात आहे. सरकारकडून आदेश देण्यात विलंब झाल्याने आणि कररचनेबाबत स्पष्टता नसल्याने बँकांनी सावध भूमिका घेतली आहे. परिणामी मोठ्या प्रमाणात सोने सीमाशुल्कात अडकून पडल्याचेही समोर आले आहे. अधिकृत आकडेवारीनुसार, मार्च महिन्यात सोन्याच्या आयातीचे मूल्य सुमारे ३२ टक्क्यांनी घसरले आहे. पुढील काही आठवड्यांत परिस्थिती सुधारली नाही, तर सोन्याच्या दरात आणखी वाढ होण्याची शक्यता नाकारता येत नाही, आणि याचा थेट परिणाम ग्राहकांच्या खिशावर होणार आहे.