महाराष्ट्र २४ ।। ऑनलाईन ।। विशेष प्रतिनिधी ।। दि. ०८ मे २०२६ ।। मुंबईच्या आर्थिक धडधडीत काल भारत-व्हिएतनाम मैत्रीचा नवा अध्याय लिहिला गेला. उद्योग, व्यापार, संस्कृती आणि पर्यटन या सगळ्याच क्षेत्रांत दोन्ही देशांनी हातात हात घालून पुढे जाण्याचा निर्धार व्यक्त केला. महाराष्ट्राने “विश्वासार्ह भागीदार” म्हणून व्हिएतनामसमोर उभं राहत गुंतवणुकीसाठी थेट निमंत्रण दिलं आणि मुंबईत भरलेल्या बिझनेस फोरममध्ये जागतिक भागीदारीची नवी भाषा ऐकायला मिळाली.
मुख्यमंत्री देवेंद्र फडणवीस यांनी महाराष्ट्रातील औद्योगिक संधींचा पट उलगडताना मुंबईपासून नागपूर, पुणे, गडचिरोलीपर्यंत गुंतवणुकीसाठी मोठं आवाहन केलं. व्हिएतनामच्या उद्योगांना ऊर्जा, औषधनिर्माण, पर्यटन, माहिती तंत्रज्ञान आणि पायाभूत सुविधा क्षेत्रात मोठ्या संधी असल्याचं त्यांनी सांगितलं. विशेष म्हणजे, व्हिएतनामच्या विनग्रूप कंपनीच्या तब्बल ६.५ अब्ज डॉलर्सच्या प्रस्तावित गुंतवणुकीचं स्वागत करताना हा दक्षिण-पूर्व आशियातून महाराष्ट्रात झालेला सर्वात मोठा करार असल्याचंही स्पष्ट करण्यात आलं.
या भेटीत केवळ उद्योगांचाच नव्हे, तर सांस्कृतिक नात्यांचाही धागा घट्ट करण्याचा प्रयत्न दिसून आला. नागपूरच्या बौद्ध वारशाचा उल्लेख करत अजिंठा-वेरूळ लेण्यांपासून थेट हो चि मिन्ह सिटीपर्यंत पर्यटनाचा नवा मार्ग तयार करण्याचा प्रस्ताव मांडण्यात आला. छत्रपती संभाजीनगर आणि हो चि मिन्ह सिटीदरम्यान थेट विमानसेवा सुरू करण्याची कल्पनाही चर्चेत आली. व्यापारासोबत संस्कृतीची जोड दिली गेली तर नातं अधिक टिकाऊ होतं, याचं भान या फोरममध्ये स्पष्टपणे जाणवलं.
व्हिएतनामचे राष्ट्राध्यक्ष तो लाम यांनीही भारत-व्हिएतनाम भागीदारीला भविष्यातील आर्थिक शक्ती मानत उद्योग क्षेत्राला पुढाकार घेण्याचं आवाहन केलं. इलेक्ट्रिक वाहनं, ऊर्जा, तंत्रज्ञान आणि लॉजिस्टिक क्षेत्रात दोन्ही देशांसाठी मोठ्या संधी असल्याचं त्यांनी सांगितलं. जागतिक बाजारपेठ बदलत असताना विश्वासार्ह मित्रांची गरज अधिक वाढली आहे आणि महाराष्ट्र-व्हिएतनाम संबंध त्याच दिशेने वेगाने पुढे जात असल्याचं चित्र मुंबईतील या बैठकीत स्पष्ट दिसून आलं.