महाराष्ट्र २४ ।। ऑनलाईन ।। विशेष प्रतिनिधी ।। दि. १२ मे २०२६ ।। पुणेकरांना गेली अनेक महिने दाखवले जाणारे हिंजवडी ते शिवाजीनगर मेट्रोचे स्वप्न अखेर प्रत्यक्षात उतरण्याच्या उंबरठ्यावर येऊन ठेपले आहे. मात्र या प्रवासात आश्वासनांचे इतके फेरे झाले की, पुणेकरांनी “मेट्रो आधी येणार की पावसाळा?” असा उपरोधिक सवाल विचारायला सुरुवात केली होती. मार्चमध्ये सुरू होईल असे सांगितले गेलेले काम मेमध्ये ढकलले गेले आणि आता जूनअखेरची नवी तारीख समोर आली आहे. तरीही पूर्ण मार्ग एकाचवेळी सुरू होणार नसून पहिल्या टप्प्यात फक्त १२ स्थानकेच प्रवाशांसाठी खुली केली जाणार आहेत. त्यामुळे “मेट्रो आली, पण अर्धीच!” अशी भावना अनेकांच्या मनात आहे. तरीही हिंजवडी आयटी पट्टा आणि शहराच्या मध्यवर्ती भागाला जोडणारा हा प्रकल्प पुण्याच्या वाहतुकीसाठी मोठा टप्पा मानला जात आहे.
पिंक लाइन म्हणून ओळखला जाणारा हा मार्ग तब्बल २३.२३ किलोमीटर लांबीचा असून पूर्णपणे उन्नत मार्गिकेवर धावणार आहे. मान ते बालेवाडीपर्यंतच्या १२ स्थानकांचे काम जवळपास पूर्ण झाले असून, मेट्रो रेल्वे सुरक्षा आयुक्तांकडून मेअखेर सुरक्षा तपासणी केली जाणार आहे. सर्व चाचण्या यशस्वी झाल्यास जूनच्या अखेरीस या मार्गावर मेट्रो धावण्याची शक्यता आहे. मात्र शिवाजीनगरच्या दिशेने असलेल्या ११ स्थानकांचे काम अजून बाकी आहे. बाणेर आणि शिवाजीनगर परिसरातील काही महत्त्वाच्या स्थानकांमध्ये निर्माण झालेल्या अडथळ्यांमुळे संपूर्ण प्रकल्प रखडल्याचे अधिकाऱ्यांचे म्हणणे आहे. त्यामुळे आता संपूर्ण मार्ग ऑक्टोबर २०२६ पर्यंतच सुरू होण्याची शक्यता वर्तवली जात आहे. पुणेकरांसाठी ही केवळ मेट्रो नसून रोजच्या ट्रॅफिकच्या त्रासातून सुटकेची आशा बनली आहे.
या प्रकल्पाचे सर्वात मोठे वैशिष्ट्य म्हणजे “ट्रिपल कनेक्टिव्हिटी”. सध्या सुरू असलेल्या पीसीएमसी-स्वारगेट आणि वनाझ-रामवाडी या दोन्ही मेट्रो मार्गांना शिवाजीनगर येथे या नव्या मेट्रोची जोड मिळणार आहे. म्हणजे पुण्यातील तीन प्रमुख मेट्रो मार्ग एकमेकांना जोडले जाणार असून शहरातील प्रवासाचे गणितच बदलण्याची शक्यता आहे. पहिल्या टप्प्यात मेगापोलिस, इन्फोसिस फेज २, विप्रो, वाकड चौक, बालेवाडी स्टेडियम ते रामनगरपर्यंतची स्थानके सुरू होणार आहेत. तर दुसऱ्या टप्प्यात बाणेर, पुणे विद्यापीठ, आरबीआय, कृषी महाविद्यालय आणि शिवाजीनगरसह संपूर्ण मार्ग खुला केला जाणार आहे. फ्रेंच कंपनी Keolis पुढील दहा वर्षे या मार्गावरील गाड्या, स्थानके आणि तिकीट व्यवस्थापन सांभाळणार आहे. मात्र भाडेदर आणि वेळापत्रक अद्याप जाहीर न झाल्याने पुणेकरांची उत्सुकता अजून कायम आहे.