महाराष्ट्र २४ ।। ऑनलाईन ।। विशेष प्रतिनिधी ।। दि. १८ मे २०२६ ।। मुंबई-पुणे प्रवासाचा वेग वाढवणारी आणि घाटातील वाहतूक कोंडी फोडणारी बहुचर्चित ‘मिसिंग लिंक’ आता प्रवाशांसाठी खुली झाली आहे. आधुनिक बोगदे, केबल-स्टेड पूल आणि कमी झालेले अंतर यामुळे हा मार्ग महाराष्ट्राच्या विकासाचे नवे प्रतीक मानला जात आहे. पण ज्या बोगद्यांतून गाड्या सुसाट धावत आहेत, तिथेच मोबाईल नेटवर्क अचानक गायब होत असल्याने प्रवाशांच्या मनात भीतीचे सावट पसरले आहे. “गाडीत बसलो आणि नेटवर्कच गायब झालं!” अशी प्रतिक्रिया अनेक वाहनचालक व्यक्त करत आहेत. आजच्या काळात मोबाईल म्हणजे माणसाचा दुसरा श्वास बनला असताना, बोगद्यात प्रवेश करताच फोन ‘नो सर्व्हिस’ दाखवू लागल्याने अनेकांचा थरकाप उडत आहे. विकासाच्या महामार्गावर धावताना संपर्कच तुटत असेल, तर आपत्कालीन परिस्थितीत काय होणार, हा प्रश्न आता गंभीर बनला आहे.
मुख्यमंत्री Devendra Fadnavis, उपमुख्यमंत्री Eknath Shinde यांच्या उपस्थितीत या मिसिंग लिंकचे लोकार्पण करण्यात आले. महाराष्ट्र राज्य रस्ते विकास महामंडळाने उभारलेल्या या प्रकल्पामुळे मुंबई-पुणे घाटातील प्रवासाचे अंतर १९ किलोमीटरवरून थेट १३ किलोमीटरवर आले आहे. वेळ, इंधन आणि वाहतूक कोंडी — तिन्हींची बचत होत असल्याने हा प्रकल्प अभियांत्रिकीचा चमत्कार मानला जातो आहे. मात्र, या चमकदार विकासाच्या भिंतीआड आता नेटवर्कची मोठी समस्या उभी राहिली आहे. बोगद्यात एखादे वाहन बंद पडले, अपघात झाला किंवा वैद्यकीय आपत्कालीन स्थिती निर्माण झाली, तर मदतीसाठी फोन करायचा कसा? हा प्रश्न वाहनचालकांना अस्वस्थ करू लागला आहे. “रस्ता वेगवान झाला, पण संपर्क हरवला,” अशी भावना आता अनेक प्रवाशांकडून व्यक्त होत आहे.
तज्ज्ञांच्या मते, डोंगरातील कठीण खडक आणि खोल बोगद्यांमुळे मोबाईल सिग्नल आतपर्यंत पोहोचत नाहीत. टायगर व्हॅली परिसरातील या बोगद्यांमध्ये दगडी थर इतके जाड आहेत की, नेटवर्क अक्षरशः अडकून पडते. यावर उपाय म्हणून आता बोगद्यांच्या भिंतींवर ‘लिकी फिडर केबल्स’ बसवण्याची योजना आखली जात आहे. या केबल्स अँटेनाप्रमाणे काम करून संपूर्ण बोगद्यात नेटवर्क पोहोचवतील, असा दावा तज्ज्ञांनी केला आहे. मात्र तोपर्यंत प्रवाशांना बोगद्यात प्रवेश करताना “नेटवर्क गेले तर?” या भीतीसहच प्रवास करावा लागणार आहे. महाराष्ट्राच्या विकासाचा हा नवा मार्ग सध्या वेगवान असला, तरी संपर्क तुटण्याच्या समस्येमुळे त्यावर चिंतेची सावलीही तितकीच गडद झाली आहे.