महाराष्ट्र २४ ।। ऑनलाईन ।। विशेष प्रतिनिधी ।। दि. २२ मे २०२६ ।। सोनं आणि चांदीच्या बाजारात सध्या जणू पैशांचं वादळ घोंगावत आहे. दररोज बदलणारे भाव पाहून गुंतवणूकदारांचे डोळे विस्फारले आहेत, तर सराफ बाजारात चर्चांचा अक्षरशः धुरळा उडाला आहे. MCX वर दोन्ही धातूंमध्ये जोरदार तेजी दिसत असून तज्ज्ञांनी केलेली नवी भविष्यवाणी अनेकांना चकीत करणारी ठरत आहे. काही बाजार विश्लेषकांच्या मते, येत्या काळात सोन्याचा भाव थेट प्रति १० ग्रॅम १.७० लाख रुपयांपर्यंत झेपावू शकतो, तर चांदीचा दर किलोमागे तब्बल ३ लाख रुपये गाठू शकतो. वाढलेले इंपोर्ट ड्यूटी, जागतिक अस्थिरता, युद्धजन्य परिस्थिती आणि गुंतवणूकदारांचा सुरक्षित पर्याय म्हणून सोन्याकडे वाढलेला ओढा यामुळे या किमतींना जणू रॉकेट लागल्याचे चित्र आहे. “आज घेतलं नाही तर उद्या हात चोळत बसावं लागेल,” अशी मानसिकता बाजारात निर्माण होत असल्याने अनेकजण घसरणीची वाट पाहत आहेत.
सध्या MCX वर सोन्याचा भाव सुमारे १,५८,८०० रुपयांच्या आसपास फिरत आहे. बाजार तज्ज्ञांच्या मते, १,५४,५०० रुपयांचा स्तर हा सोन्यासाठी मजबूत आधार मानला जात आहे. हा स्तर टिकून राहिला तर पुढील टप्पा थेट १.७० लाख रुपयांचा असू शकतो. म्हणजेच बाजारात पडणारी प्रत्येक छोटी घसरण ही खरेदीची संधी ठरू शकते, असा संकेत दिला जात आहे. चांदीबाबतही जवळपास अशीच स्थिती आहे. सध्या प्रति किलो २,७२,८०० रुपयांच्या आसपास व्यवहार सुरू असून २,६१,००० रुपयांचा स्तर महत्त्वाचा मानला जात आहे. हा आधार कायम राहिला तर चांदी २.८५ लाखांचा टप्पा ओलांडून थेट ३ लाखांपर्यंत झेपावू शकते, असा अंदाज व्यक्त केला जात आहे. त्यामुळे गुंतवणूकदारांच्या नजरा आता बाजारातील प्रत्येक हालचालीवर खिळल्या आहेत. कारण एका दिवसातील तेजी-घसरणीत लाखोंचा खेळ होऊ शकतो.
तज्ज्ञ मात्र या चमकदार तेजीच्या मागे सावधगिरीचाही इशारा देत आहेत. कारण सोनं-चांदीचा बाजार जितका आकर्षक दिसतो, तितकाच तो धोकादायकही ठरू शकतो. शॉर्ट टर्ममध्ये मोठे चढ-उतार होण्याची शक्यता नाकारता येत नसल्याने ‘स्टॉप लॉस’ हा शब्द आता गुंतवणूकदारांसाठी कवच बनला आहे. सोन्यासाठी १,५४,५०० रुपयांचा आणि चांदीसाठी २,६१,००० रुपयांचा स्टॉप लॉस ठेवण्याचा सल्ला दिला जात आहे. दीर्घकालीन गुंतवणूक करणाऱ्यांसाठी मात्र बाजार अजूनही तेजीकडे झुकलेला असल्याचे तज्ज्ञांचे मत आहे. त्यामुळे “घसरण आली की खरेदी करा” हा फॉर्म्युला पुन्हा चर्चेत आला आहे. पण एक गोष्ट मात्र स्पष्ट आहे—सोनं आणि चांदी आता केवळ दागिने राहिलेले नाहीत; तर जागतिक अस्थिरतेत लोकांचा विश्वास जपणारे आर्थिक कवच बनले आहेत.