चार दिवस वादळी पावसाचा इशारा; वाऱ्यांसह विजांचा धडाका, शेतकरी सतर्क
महाराष्ट्र २४ ।। ऑनलाईन ।। विशेष प्रतिनिधी ।। दि. २४ मे २०२६ ।। अरबी समुद्राच्या किनाऱ्यावर काळे ढग जमू लागले आणि कोकण-गोव्याच्या वाऱ्यांनीही आता पावसाची चाहूल द्यायला सुरुवात केली आहे. नैऋत्य मॉन्सूनने दक्षिण-पश्चिम अरबी समुद्रात पुढे सरकत गोवा, कोकण किनारपट्टी आणि बंगालच्या उपसागराच्या काही भागांवर जोरदार हालचाली सुरू केल्याने राज्यातील वातावरण अचानक बदलले आहे. उकाड्याने हैराण झालेल्या जनतेला पावसाची चाहूल सुखावणारी असली, तरी हवामान खात्याने दिलेला वादळी पावसाचा इशारा प्रशासनाची धावपळ वाढवणारा ठरत आहे. पुढील चार दिवस राज्यातील अनेक भागांत मेघगर्जनेसह मुसळधार पावसाची शक्यता व्यक्त करण्यात आली असून, विजांचा कडकडाट आणि ताशी ४० ते ५० किलोमीटर वेगाने वाहणारे वारे नागरिकांची परीक्षा पाहणार आहेत.
कोकण, मध्य महाराष्ट्र आणि मराठवाड्यातील अनेक जिल्ह्यांत ढगांचा मुक्काम वाढणार असल्याचे हवामान विभागाने स्पष्ट केले आहे. विशेषतः पुणे, सातारा, कोल्हापूरसह घाटमाथ्यावरील भागांत विजांसह पावसाचे सत्र सुरू राहण्याची चिन्हे आहेत. उत्तर महाराष्ट्र आणि विदर्भातील काही जिल्ह्यांना ‘ऑरेंज’ आणि ‘यलो’ अलर्ट जारी करण्यात आला आहे. विदर्भात काही ठिकाणी वादळी वाऱ्यासह मुसळधार पावसाची शक्यता असल्याने प्रशासन सतर्क झाले आहे. उन्हाच्या झळांनी कोरडी पडलेली जमीन आता पहिल्या पावसाच्या थेंबांनी भिजणार असली, तरी अचानक बदललेल्या हवामानामुळे नागरिकांमध्ये धास्तीचे वातावरण निर्माण झाले आहे.
दरम्यान, बंगालच्या उपसागरात निर्माण झालेल्या कमी दाबाच्या पट्ट्यामुळे मॉन्सूनला वेग मिळत असल्याचे हवामान तज्ज्ञांचे मत आहे. अंदमान समुद्र, कोमोरिन परिसर आणि आग्नेय अरबी समुद्रात मॉन्सूनची आगेकूच सुरू असून, केरळमध्ये पुढील आठवड्यात मॉन्सून दाखल होण्याची शक्यता वर्तवण्यात आली आहे. त्यामुळे देश अधिकृतपणे पावसाळ्याच्या उंबरठ्यावर येऊन ठेपला आहे. हवामान खात्याच्या मते, यंदा मॉन्सून वेळेआधी सक्रिय होण्याची चिन्हे दिसत असून, किनारपट्टी भागांत त्याचा प्रभाव सर्वाधिक जाणवू लागला आहे. समुद्र खवळण्याची शक्यता लक्षात घेता मच्छीमारांनाही खोल समुद्रात जाण्याचा इशारा देण्यात आला आहे.
उन्हाळा संपण्यास अवघे काही दिवस उरले असताना राज्यातील वातावरणाने अचानक घेतलेली ही कलाटणी नागरिकांसाठी दिलासादायक आणि धोक्याची दोन्ही ठरत आहे. एका बाजूला उकाड्याने त्रस्त झालेल्या जनतेला पावसाची आतुरता आहे, तर दुसऱ्या बाजूला वीज, वादळ आणि मुसळधार सरींमुळे जनजीवन विस्कळीत होण्याची भीती व्यक्त होत आहे. प्रशासनाने शेतकऱ्यांना शेतीमाल सुरक्षित ठेवण्याचा सल्ला दिला असून, विजांच्या वेळी उघड्यावर जाणे टाळण्याचे आवाहन करण्यात आले आहे. कोकण किनारपट्टीवर मॉन्सूनची चाहूल आता स्पष्ट ऐकू येऊ लागली असून, पावसाळ्याच्या स्वागतासाठी निसर्गाने जणू रणशिंगच फुंकले आहे.