इंधन, सोने, चांदीच्या दरवाढीने सर्वसामान्यांचे कंबरडे मोडले
महाराष्ट्र २४ ।। ऑनलाईन ।। विशेष प्रतिनिधी ।। दि. २५ मे २०२६ ।। Gold Silver Prices: घरातला गॅस महाग, पेट्रोल-डिझेल महाग, भाज्या महाग आणि आता सराफा बाजारानेही सर्वसामान्यांच्या खिशावर सरळ हातोडाच मारला आहे. महागाईने जनतेचा जीव मेटाकुटीला आणला असताना सोमवारच्या सकाळी सोनं-चांदीच्या दरांनी अक्षरशः उंच भरारी घेतली. तेल कंपन्यांनी पेट्रोल-डिझेलच्या दरात पुन्हा वाढ करून नागरिकांना झटका दिलाच होता; पण त्याच दिवशी सोनं आणि चांदीनेही दरवाढीचा डंका वाजवत बाजारपेठेला चकित केले. “सोनं घेणं तर दूर, आता पाहायलाही भीती वाटते,” अशी प्रतिक्रिया अनेक ग्राहकांनी व्यक्त केली.
मुंबईसह देशभरातील सराफा बाजारात आज सोन्याचे भाव झपाट्याने वाढले. २४ कॅरेट सोन्याचा दर थेट १ लाख ५९ हजारांच्या घरात पोहोचला, तर चांदीने तब्बल चार हजार रुपयांची उसळी घेत दोन लाख पंच्याहत्तर हजारांच्या आसपास झेप घेतली. काही दिवसांपूर्वी दर घसरल्याने ग्राहकांना दिलासा मिळेल असे वाटत असतानाच बाजाराने अचानक पलटी मारली. परिणामी लग्नसराई, गुंतवणूक आणि दागिने खरेदी करणाऱ्यांचे गणितच कोलमडले. “महागाईच्या या लाटेत मध्यमवर्गीय माणूस वाहून जातोय,” अशी भावना व्यापाऱ्यांतूनही व्यक्त होत आहे.
जागतिक बाजारातील घडामोडींनीही या तेजीला खतपाणी घातले. अमेरिका-इराण युद्धबंदीच्या चर्चांमुळे तेल बाजारात अस्थिरता निर्माण झाली, डॉलरच्या मूल्यात चढ-उतार झाले आणि त्याचा थेट परिणाम सोन्या-चांदीच्या व्यवहारावर झाला. अमेरिकेचे राष्ट्राध्यक्ष Donald Trump यांच्या वक्तव्यांनंतर गुंतवणूकदारांनी पुन्हा सुरक्षित पर्याय म्हणून सोन्याकडे धाव घेतल्याचे चित्र दिसले. एकीकडे जागतिक बाजारात तेलाचे दर घसरल्याची चर्चा सुरू असताना भारतात मात्र पेट्रोल-डिझेल आणि मौल्यवान धातूंच्या दरवाढीने नागरिकांचा संताप वाढला आहे.
दरम्यान, गेल्या अकरा दिवसांत पेट्रोल-डिझेलच्या किमतीत चौथ्यांदा वाढ झाल्याने वाहतूक, शेती, किराणा आणि उद्योग क्षेत्रावरही परिणाम होण्याची भीती व्यक्त केली जात आहे. मुंबईत पेट्रोल १११ रुपयांच्या पुढे गेले असून पुणे, नागपूर, कोल्हापूरसह अनेक शहरांत इंधनाचे दर सर्वसामान्यांच्या आवाक्याबाहेर जात आहेत. “सरकार महागाईवर नियंत्रण ठेवण्यात अपयशी ठरत आहे,” अशी टीका विरोधकांकडून सुरू झाली आहे. दुसरीकडे बाजारतज्ज्ञ मात्र जागतिक तणाव कायम राहिला, तर येत्या काही दिवसांत सोने-चांदी आणि इंधनाचे दर आणखी भडकू शकतात, असा इशारा देत आहेत.