सिलिंडर महाग, पुरवठा अपुरा; चहा, वडापावपासून जेवणापर्यंत सर्वच पदार्थांच्या दरात वाढ, ग्राहकांच्या खिशावर नवा भार
महाराष्ट्र २४ ।। विशेष प्रतिनिधी ।। दि. १४ जून २०२६ ।। पुणेकरांच्या रोजच्या जीवनात चहा, वडापाव, मिसळ आणि हॉटेलमधील जेवण हा जसा अविभाज्य भाग आहे, तसाच त्या पदार्थांच्या मागे उभा असलेला गॅस सिलिंडरही महत्त्वाचा आहे. पण आता याच सिलिंडरने हॉटेल व्यावसायिकांची झोप उडवली आहे. व्यावसायिक गॅस सिलिंडरच्या वाढत्या किमती आणि अपुऱ्या पुरवठ्यामुळे पुण्यातील हॉटेल व्यवसाय अक्षरशः ‘गॅस’वर आला आहे. परिणामी खाद्यपदार्थांचे दर वाढले असून सर्वसामान्य ग्राहकांच्या खिशाला पुन्हा एकदा कात्री लागली आहे. एकीकडे महागाईचा डोंगर आणि दुसरीकडे वाढता व्यावसायिक खर्च यामुळे हॉटेल चालकांपुढे अस्तित्व टिकवण्याचे मोठे आव्हान उभे ठाकले आहे.
पूर्वी बुकिंग केल्यानंतर सहज उपलब्ध होणारा व्यावसायिक गॅस सिलिंडर आता वेळेवर मिळत नसल्याची तक्रार व्यावसायिकांकडून केली जात आहे. काही ठिकाणी तर सिलिंडरसाठी जास्त पैसे मोजावे लागत असल्याचेही समोर आले आहे. त्यामुळे हॉटेल, उपाहारगृहे, वडापाव केंद्रे आणि चहाच्या टपऱ्यांचे आर्थिक गणित पूर्णपणे बिघडले आहे. ज्यांच्या व्यवसायाचा पाया रोजच्या विक्रीवर उभा आहे, त्यांच्यासाठी ही परिस्थिती अधिकच गंभीर ठरत आहे. ग्राहक टिकवायचे की वाढलेला खर्च सांभाळायचा, या कात्रीत अनेक व्यावसायिक सापडले आहेत. परिणामी अनेकांनी नाईलाजाने पदार्थांच्या दरात वाढ करण्याचा निर्णय घेतला आहे.
गॅसची बचत करण्यासाठी काही ठिकाणी धक्कादायक बदलही दिसून येत आहेत. पूर्वी दोन किंवा तीन शेगड्यांवर सुरू असलेले स्वयंपाकघर आता एका शेगडीवर चालवले जात आहे. त्यामुळे खाद्यपदार्थ तयार होण्याचा वेग कमी झाला असून ग्राहकांना प्रतीक्षा करावी लागत आहे. गर्दीच्या वेळेत ऑर्डर पूर्ण करण्यासाठी व्यावसायिकांना मोठी कसरत करावी लागत आहे. वडापाव, भजी, चहा यांसारखे पदार्थ मोठ्या प्रमाणावर गॅसवर अवलंबून असल्याने त्यांचे उत्पादन खर्च सर्वाधिक वाढले आहेत. पर्यायी इंधन वापरण्याचा प्रयत्न काही ठिकाणी होत असला, तरी त्यातून अपेक्षित गुणवत्ता आणि वेग मिळत नसल्याची व्यावसायिकांची तक्रार आहे.
या संकटाचा सर्वात मोठा परिणाम शेवटी ग्राहकांवरच होताना दिसत आहे. चहाचा कप, वडापाव, नाश्ता किंवा हॉटेलमधील साधे जेवणही आता महाग होत चालले आहे. वाढत्या खर्चामुळे ग्राहक नाराज आहेत, तर व्यावसायिक हतबल आहेत. पुणे रेस्टॉरंट अँड हॉटेलियर्स असोसिएशननेही शासनाने गॅस पुरवठा सुरळीत करावा आणि दर नियंत्रणासाठी तातडीने उपाययोजना कराव्यात, अशी मागणी केली आहे. कारण गॅसची ही समस्या केवळ एका उद्योगाची नाही, तर लाखो ग्राहकांच्या दैनंदिन जीवनाशी जोडलेली आहे. सिलिंडरची टंचाई आणि दरवाढ असेच कायम राहिले, तर पुढील काही दिवसांत खाद्यपदार्थ आणखी महाग होण्याची शक्यता नाकारता येत नाही. पुण्याच्या खाद्यसंस्कृतीवर आलेले हे संकट आता शासन कितपत लवकर दूर करते, याकडे सर्वांचे लक्ष लागले आहे.