दरवाढीच्या धक्क्याने सराफा बाजारात खळबळ; चांदीनेही धरला वेगाचा रस्ता
महाराष्ट्र २४ ।। विशेष प्रतिनिधी ।। दि. १५ जून २०२६ ।। Gold-Silver Price Today: सोन्याचा भाव वाढतोय की सोनंच आता माणसांना भाव देईनासं झालंय, असा प्रश्न सर्वसामान्य ग्राहकांना पडू लागला आहे. गेल्या काही दिवसांपासून सराफा बाजारात सोन्याने अशी मुसंडी मारली आहे की लग्नसराईचे नियोजन करणाऱ्यांच्या कपाळावर आठ्या आणि गुंतवणूकदारांच्या चेहऱ्यावर हास्य उमटले आहे. रविवारी जाहीर झालेल्या नव्या दरांनी बाजारात अक्षरशः खळबळ उडवली. १० ग्रॅम २४ कॅरेट सोन्याचा भाव तब्बल १ लाख ५० हजार रुपयांच्या घरात पोहोचला असून, ‘आज घेतलं नाही तर उद्या आणखी महाग होईल’ या भीतीने ग्राहकांच्या मनात संभ्रमाचे वातावरण निर्माण झाले आहे. सोन्याचा हा ‘गोल्ड गेम’ नेमका कुठे थांबणार, हा प्रश्न आता चर्चेचा विषय ठरला आहे.
देशभरातील सराफा बाजारात सोन्याच्या दरांनी नवा उच्चांक गाठला आहे. बुलियन मार्केटच्या आकडेवारीनुसार २४ कॅरेट सोन्याचा दर १० ग्रॅमसाठी १,५०,९०० रुपयांवर पोहोचला आहे, तर २२ कॅरेट सोन्याचा दर १,३८,३२५ रुपये इतका नोंदवला गेला आहे. एवढ्यावरच हा धक्का थांबलेला नाही. चांदीनेही वेग घेतला असून एक किलो चांदीचा दर २,४७,६३० रुपयांपर्यंत पोहोचला आहे. काही महिन्यांपूर्वी जे दर अविश्वसनीय वाटत होते, ते आता वास्तव बनले आहेत. परिणामी दागिने खरेदी करणाऱ्यांपासून व्यापाऱ्यांपर्यंत सर्वच जण या वाढत्या दरांकडे चिंतेने पाहू लागले आहेत.
मुंबई, पुणे, नागपूर आणि नाशिकसारख्या प्रमुख शहरांमध्येही सोन्याचे दर जवळपास सारखेच आहेत. २२ कॅरेट सोन्याचा दर १,३८,०७८ रुपये तर २४ कॅरेट सोन्याचा दर १,५०,६३० रुपये इतका आहे. मात्र या किमतींमध्ये जीएसटी, मेकिंग चार्ज आणि इतर करांचा समावेश नसल्याने प्रत्यक्ष खरेदी करताना ग्राहकांच्या खिशावर आणखी मोठा भार पडणार आहे. सराफा व्यावसायिकांच्या मते, आंतरराष्ट्रीय बाजारातील अस्थिरता, डॉलरमधील चढ-उतार आणि सुरक्षित गुंतवणुकीसाठी वाढलेली मागणी यामुळे सोन्याच्या दरांना सतत बळ मिळत आहे.
दरम्यान, बाजारातील जाणकारांच्या मते ही तेजी तात्पुरती नसून पुढील काळातही सोन्याचे भाव उच्च पातळीवर राहू शकतात. त्यामुळे गुंतवणूकदारांसाठी सोनं अजूनही आकर्षणाचा केंद्रबिंदू ठरत आहे. मात्र सामान्य ग्राहकांसाठी ही वाढती किंमत मोठी डोकेदुखी बनली आहे. घरात लग्नकार्य असो, सणासुदीची खरेदी असो किंवा बचतीचा विचार असो, प्रत्येक निर्णय आता सोन्याच्या वाढत्या भावाभोवती फिरताना दिसत आहे. सराफा बाजारात सध्या एकच चर्चा रंगली आहे—सोनं चमकतंय, पण त्याचा प्रकाश ग्राहकांच्या खिशाला चटका देतोय!