पुढील तीन दिवस संततधार; घाट परिसरात अतिमुसळधार पावसाचा इशारा, धरणसाठ्यात वाढीने दिलासा
महाराष्ट्र २४ ।। ऑनलाईन ।। विशेष प्रतिनिधी ।। दि. २३ जुलै २०२६ ।। जुलैच्या सुरुवातीला दमदार हजेरी लावल्यानंतर काही दिवस विश्रांती घेतलेल्या मान्सूनने पुन्हा एकदा महाराष्ट्रात जोरदार पुनरागमन केले आहे. गेल्या चार-पाच दिवसांपासून राज्यातील विविध भागांत सुरू असलेल्या पावसाने आता पुणे जिल्ह्यातही चांगलाच जोर धरला आहे. हवामान विभागाने पुढील तीन दिवस पुणे शहरासह जिल्ह्यात पावसाचा जोर कायम राहण्याचा अंदाज व्यक्त केला असून, घाटमाथा परिसरासाठी रेड अलर्ट जारी करण्यात आला आहे. त्यामुळे प्रशासनाने नागरिकांना विशेष सतर्क राहण्याचे आवाहन केले आहे.
आज पुणे जिल्ह्यासाठी यलो अलर्ट जाहीर करण्यात आला असून शहर आणि उपनगरांमध्ये हलका ते मध्यम स्वरूपाचा पाऊस पडण्याची शक्यता आहे. मात्र ताम्हिणी, भोर, मुळशी, वेल्हा, आंबेगाव आणि इतर घाटमाथा भागात मुसळधार ते अतिमुसळधार पावसाचा इशारा देण्यात आला आहे. या पार्श्वभूमीवर विकेंडमध्ये पर्यटनासाठी डोंगरदऱ्या, धबधबे किंवा घाटरस्त्यांकडे जाण्याचा बेत आखणाऱ्या पर्यटकांनी विशेष काळजी घ्यावी, असा सल्ला प्रशासन आणि हवामान विभागाने दिला आहे.
सततच्या पावसामुळे पुणे जिल्ह्यातील प्रमुख धरणांमध्ये जलसाठा झपाट्याने वाढत आहे. त्यामुळे शेतीला आवश्यक पाणी उपलब्ध होण्याबरोबरच पुणे शहराच्या पिण्याच्या पाण्याचाही प्रश्न काही प्रमाणात मार्गी लागण्याची चिन्हे आहेत. गेल्या काही महिन्यांपासून पाणीटंचाईची चिंता व्यक्त केली जात होती. मात्र मान्सून सक्रिय झाल्याने धरणसाठ्यात होत असलेली वाढ शेतकरी आणि नागरिकांसाठी मोठा दिलासा ठरत आहे. कृषी क्षेत्रालाही या पावसाचा सकारात्मक फायदा होण्याची अपेक्षा व्यक्त केली जात आहे.
दरम्यान, कोकण किनारपट्टी आणि लगतच्या घाटमाथ्यावरही जोरदार पावसाचा अंदाज असल्याने त्या भागांसाठी ऑरेंज अलर्ट जारी करण्यात आला आहे. हवामान तज्ज्ञांच्या मते, उत्तर भारतातील दोन सायक्लोनिक सर्क्युलेशन तसेच अरबी समुद्र आणि बंगालच्या उपसागरातून येणाऱ्या ओलसर वाऱ्यांमुळे मान्सून पुन्हा सक्रिय झाला आहे. याचा परिणाम महाराष्ट्रासह गुजरातमध्येही पुढील काही दिवस दिसून येणार आहे. या काळात नागरिकांनी नदी-नाले, धबधबे आणि पूरप्रवण भागांपासून दूर राहावे, हवामान विभागाच्या सूचनांचे पालन करावे आणि कोणताही अनावश्यक धोका टाळावा, असे आवाहन प्रशासनाने केले आहे.