![]()
फुलेनगरमध्ये टाकाऊ वस्तूंचा कलात्मक पुनर्वापर; महापालिकेचा अभिनव प्रयोग, नागरिकांना स्वच्छतेचा संदेश
महाराष्ट्र २४ ।। ऑनलाईन ।। विशेष प्रतिनिधी ।। पिंपरी-चिंचवड शहरात कचरा टाकण्याच्या जागा स्वच्छ ठेवण्यासाठी महापालिकेला वारंवार मोहीम राबवावी लागते. मात्र, कचरा उचलून पुन्हा त्याच ठिकाणी कचरा साचत असेल, तर केवळ स्वच्छतेच्या घोषणा देऊन उपयोग काय? या प्रश्नावर कल्पकतेचा उपाय शोधत महापालिकेच्या आरोग्य विभागाने फुलेनगरमध्ये वेगळा प्रयोग केला आहे. ‘ल’ क्षेत्रीय कार्यालयांतर्गत प्रभाग क्रमांक २० मधील डी. वाय. पाटील लॉ कॉलेज परिसरातील वारंवार कचरा साचणाऱ्या ठिकाणाचे टाकाऊ वस्तूंच्या कलात्मक पुनर्वापरातून सुशोभीकरण करण्यात आले आहे. निरुपयोगी वस्तूंना आकर्षक रूप देऊन कचऱ्याच्या जागेचे सौंदर्यपूर्ण स्थळात रूपांतर करण्यात आले. महापौर रवि लांडगे, उपमहापौर शर्मिला बाबर, आयुक्त डॉ. विजय सूर्यवंशी, अतिरिक्त आयुक्त कुलदीप जंगम आणि उपआयुक्त डॉ. प्रदीप ठेंगल यांच्या मार्गदर्शनाखाली हा उपक्रम राबविण्यात आला.
या प्रयोगातून केवळ रंगरंगोटी किंवा सजावट करण्यात आलेली नाही, तर कचरा व्यवस्थापन आणि पुनर्वापराचा संदेश देण्याचा प्रयत्न झाला आहे. वारंवार कचरा साचणारे ठिकाण (गार्बेज व्हल्नरेबल पॉइंट) आकर्षक बनविल्यामुळे नागरिकांनी तेथे पुन्हा कचरा टाकू नये, अशी अपेक्षा आहे. मात्र, अशा जागांचे सुशोभीकरण करून छायाचित्रे प्रसिद्ध करणे पुरेसे नाही. नियमित स्वच्छता, देखभाल आणि कचरा टाकणाऱ्यांवर नियंत्रण ठेवले, तरच या प्रयोगाचे दीर्घकालीन यश सिद्ध होईल. महापौर रवि लांडगे यांनी शहर स्वच्छ ठेवणे ही महापालिकेसोबत प्रत्येक नागरिकाचीही जबाबदारी असल्याचे सांगितले. तर आयुक्त डॉ. विजय सूर्यवंशी यांनी अशा जागांचे सकारात्मक वापरासाठी रूपांतर करण्यावर भर दिला.
उपआयुक्त डॉ. प्रदीप ठेंगल यांनी सुशोभीकरणासोबत नियमित स्वच्छता आणि नागरिकांचे सहकार्य आवश्यक असल्याचे स्पष्ट केले. यावेळी नगरसदस्या वर्षा जगताप, आरोग्य निरीक्षक लक्ष्मण साळवे तसेच महापालिकेचे अधिकारी व कर्मचारी उपस्थित होते. टाकाऊ वस्तूंमधून सौंदर्य निर्माण करण्याचा हा प्रयोग निश्चितच स्वागतार्ह आहे. पण खरी परीक्षा आता सुरू होणार आहे. फुलेनगरमधील ही जागा पुन्हा कचराकुंडी बनू नये, यासाठी नागरिक आणि प्रशासन किती जागरूक राहतात, यावरच या उपक्रमाचे यश ठरणार आहे. स्वच्छतेचा संदेश भिंतीवर रंगविण्यापेक्षा तो नागरिकांच्या सवयींत उतरविणे अधिक महत्त्वाचे आहे.
