महाराष्ट्र २४ – ऑनलाईन वृत्तसेवा – विशेष प्रतिनिधी – दि. १५ डिसेंबर – : ख्रिसमस आणि नवीन वषार्ची चाहूल यामुळे मुंबईत पार्ट्या, एकत्र भेटणं, नाईट क्लबमध्ये जाणं या सगळ्या गोष्टी वाढू शकतात. त्यामुळे या सगळ्या पब, नाईट क्लब्सवर मुंबई महापालिका प्रशासनाची करडी नजर आहे. असं असतानाच मुंबईतल्या एका नाईट क्लबमध्ये कोरोना नियमांचं उल्लंघन झाल्याने मुंबई महापालिकेने गुन्हा दाखल केला आहे.
मुंबईतल्या सांताक्रूझ भागात असलेल्या बॉम्बे अड्डा या नाइट क्लबमध्ये मोठ्या प्रमाणावर कोरोना नियमांचं उल्लंघन केलं जात असल्याची बाब लक्षात आली. पार्टी करणा-या २७५ व्यक्तींनी मास्क घातलेला नव्हता. त्यामुळे या प्रकरणी बॉम्बे अड्डा या नाईट क्लबला ३० हजारांचा दंड ठोठावण्यात आला.
ज्या प्रमाणे बॉम्बे अड्डा या नाईट क्लबवर कारवाई झाली तशीच कारवाई दादरमधल्या प्रीतम या हॉटेलवरही करण्यात आली. प्रीतम हॉटेलवर पहाटे एकच्या सुमारास महापालिका अधिका-यांनी अचानाक भेट दिली. तेव्हा १२० जणांनी मास्क लावला नसल्याचा प्रकार निदर्शनास आला. त्यामुळे ज्यांनी कोरोनाचे नियम मोडले त्यांच्याकडून दंड वसूल करण्यात आला. अशीच कारवाई भगवती हॉटेलवरही करण्यात आली.