महाराष्ट्र २४ । विशेष प्रतिनिधी । दि. २० ऑगस्ट । आयपीएल स्पर्धेचा (IPL 2021) दुसरा टप्पा पुढील महिन्यात यूएईमध्ये सुरू होत आहे. या स्पर्धेचा पहिला टप्पा भारतामध्ये झाला होता. त्यावेळी 29 सामन्यानंतर बायो-बबलमध्ये कोरोनाचा उद्रेक झाल्यानं ही स्पर्धा अनिश्चित काळासाठी स्थगित करण्यात आली होती. आता उर्वरित 31 सामने यूएईमध्ये होणार आहेत. तीन वेळा आयपीएल स्पर्धा जिंकणाऱ्या चेन्नई सुपर किंग्सनं (CSK) या स्पर्धेची तयारी सुरू केली.
सीएसके आणि मुंबई इंडियन्स या दोन्ही टीम आयपीएलच्या तयारीसाठी यूएईमध्ये दाखल झाल्या आहेत. या टीममधील सर्वांचा 6 दिवसांचा क्वारंटाईन कालावधी देखील आता समाप्त झाला आहे.सीएसकेची टीम दुबईतील आयसीसी क्रिकेट ट्रेनिंग अकादामीमध्ये सराव करणार आहे. तर मुंबई इंडियन्सची टीम शुक्रवारपासून शेख झायद स्टेडियममध्ये सरावाला सुरुवात करणार आहे.
आयपीएलच्या यंदाच्या मोसमाच्या (IPL 2021) दुसऱ्या सत्राला 19 सप्टेंबरपासून सुरुवात होणार आहे. मोसमातल्या उरलेल्या 31 मॅच 27 दिवसांमध्ये होणार आहेत. हे सगळे सामने युएईतल्या दुबई, अबुधाबी, शारजाह या तीन स्टेडियममध्ये खेळवले जातील, तर फायनल 15 ऑक्टोबरला दुबईमध्ये होईल. चेन्नई आणि मुंबई (Chennai Super Kings vs Mumbai Indians) यांच्यातल्या सामन्याने हा टप्पा सुरू होईल.