महाराष्ट्र 24 -मुंबई
आर्थिक संकटात सापडलेल्या राज्यातील शेतकऱ्यांना दोन लाख रुपयांपर्यंतचे कर्ज माफ करणाऱ्या महात्मा जोतिराव फुले शेतकरी कर्जमुक्ती २०१९ योजनेची दुसरी यादी उद्या, शुक्रवारी जाहीर होणार आहे, अशी घोषणा सहकारमंत्री बाळासाहेब पाटील यांनी बुधवारी विधान परिषदेत केली.
कर्जमाफी योजनेच्या पहिल्या टप्प्यात १५ हजार ३५८ शेतकऱ्यांच्या कर्जखात्याची पहिली यादी घोषित करण्यात आली आहे. शेतकऱ्यांची कर्ज खाती आधार कार्डशी जोडून त्यात कर्जमाफीचे पैसे जमा करणार असल्याचे सहकारमंत्र्यांनी स्पष्ट केले. ‘राज्यातील सुमारे ३४ लाख शेतकऱ्यांना कर्जमुक्तीचा लाभ देताना त्यांना हेलपाटे मारायला लागू नयेत, तसेच कर्जमाफी योजनेत अचूकता यावी, हा टप्प्याटप्प्याने याद्या जाहीर करण्यामागील उद्देश आहे’, असे सहकारमंत्री पाटील म्हणाले. ‘पहिल्या यादीमध्ये अद्याप तरी त्रुटी असल्याचे निदर्शनास आलेले नाही’, असेही त्यांनी सभागृहात सांगितले.
‘कर्जमुक्ती योजनेची अखेरची यादी कधी जाहीर होणार? ३१ मार्चपर्यंत कर्जमाफीचे पैसे जमा न झाल्यास संबंधित शेतकरी आणि बँकांचे कर्ज खाते थकीत होणार असल्याने बँकाही अडचणीत येणार आहेत. ही तांत्रिक बाब असून, यामध्ये मुख्यमंत्र्यांनीच लक्ष घालावे’, अशी विनंती शेतकरी कामगार पक्षाचे आमदार जयंत पाटील यांनी सभागृहात केली. तेव्हा सभापती रामराजे नाईक निंबाळकर यांनी, यासंबंधी मुख्यमंत्र्यांनी राज्य बँकर्स समिती, नाबार्ड, रिझर्व्ह बँक आणि संबंधित बँक अधिकाऱ्यांची एकत्र बैठक घेऊन यातून मार्ग काढावा, असे निर्देश सरकारला दिले आहेत.