महाराष्ट्र २४ । विशेष प्रतिनिधी । दि. १४ ऑक्टोबर । ओमान आणि यूएईमध्ये होत असलेल्या टी-20 विश्वचषक क्रिकेट स्पर्धेचा थरार सुरू होण्यासाठी जेमतेम चार दिवसांचा अवधी उरला आहे. त्या पार्श्वभूमीवर ‘बीसीसीआय’ने बुधवारी ‘टीम इंडिया’च्या नव्या जर्सीचे आपल्या अधिकृत ट्विटर हॅण्डलवरून अनावरण केले आहे. यंदाच्या टी-20 विश्वचषक स्पर्धेतही हिंदुस्थानी क्रिकेटपटू नेव्ही ब्ल्यू रंगाच्या जर्सीत खेळताना दिसणार आहेत.
‘बीसीसीआय’ने प्रदर्शित केलेल्या नव्या जर्सीत ऑफिशियल किट प्रायोजक म्हणून एमपीएलचा लोगो आहे. याव्यतिरिक्त ‘टीम इंडिया’चा प्रायोजक म्हणून ‘बायजूस’चाही लोगो आहे. ‘बीसीसीआय’ने ट्विटरवर प्रदर्शित केलेल्या फोटोमध्ये लोकेश राहुल, संघाचा उपकर्णधार रोहित शर्मा, कर्णधार विराट कोहली, अष्टपैलू रवींद्र जाडेजा आणि वेगवान गोलंदाज जसप्रीत बुमराह हे नव्या जर्सीत दिसत आहेत.