महाराष्ट्र 24- मुंबई
पंतप्रधान नरेंद्र मोदी यांच्या एका ट्विटनंतर ते सोशल मीडिया सोडतील अशा चर्चांना उधाण आलं होतं. परंतु मंगळवारी पुन्हा त्यांच्या एका ट्विटनंतर सर्वच चर्चांना पूर्णविराम मिळाला होता. यावरून आता शिवसेनेनं भाजपावर निशाणा साधला आहे. पंतप्रधान मोदी हे सोशल मीडियाचा त्याग करीत आहेत काय? असा प्रश्न मोदींच्या पहिल्या ट्विटनंतर जरूर निर्माण झाला. तथापि याच हत्याराला मोदींनी नाट्यमय धार लावली हे दुसऱ्या ट्विटमधून पुढे आले. मोदी यांची ही नाट्यछटा काही तास देशभरात रंगली. शेवटी सोशल मीडियाचे व्यासपीठ हाच भाजपचा ऑक्सिजन आहे आणि ऑक्सिजनची ही नळी मोदी फेकून देतील हे अशक्य आहे. पंतप्रधान नरेंद्र मोदी हे अभिनयनिपुण आहेत, असल्याची टीका शिवसेनेनं केली आहे.
मंगळवारी दुसरं ट्विट करून ८ मार्च म्हणजेच रविवारी महिला दिनाच्या दिवशी आपली सर्व सोशल मीडिया अकाऊंट्स महिलांना हँडल करायला देण्याची घोषणा पंतप्रधान नरेंद्र मोदी यांनी केली. त्यामुळे पंतप्रधान नरेंद्र मोदी हे सोशल मीडिया सोडणार नाहीत हे स्पष्ट झालं आहे. यावरून शिवसेनेनं सामनाच्या संपादकीयमधून भाजपावर आणि पंतप्रधानांवर निशाणा साधला आहे. शेवटी सोशल मीडियाचे व्यासपीठ हाच भाजपचा ऑक्सिजन आहे आणि ऑक्सिजनची ही नळी मोदी फेकून देतील हे अशक्यच! आपण सोशल मीडिया सोडणार नाही हे आता मोदींनीच स्वयंस्पष्ट केल्यामुळे भाजपच्या सायबर फौजांचे काय होणार? हा प्रश्नही निकाली निघाला आहे. काही तासांच्या अफवांनी या फौजांचा प्राण जरूर तळमळला असेल, पण फौजेला आता नवे काम मिळाले आहे. आपले पंतप्रधान मोदी हे अभिनयनिपुण आहेत. त्यामुळे ते कधी कोणती नाटय़छटा सादर करतील याचा नेम नाही. असं शिवसेनेनं म्हटलं आहे.