महाराष्ट्र २४ । विशेष प्रतिनिधी । दि . ५ फेब्रुवारी । आपल्या वापरकर्त्यांसाठी सतत नवनवीन फीचर्स जगातील सर्वांत लोकप्रिय चॅटिंग अ‍ॅप्सपैकी एक असलेले व्हॉट्सअॅप बाजारात आणत असते. त्यामधील एक फीचर म्हणजे तुमचा मोबाईल डेटा संपला असेल तरीही तुम्ही तुमच्या सेकंडरी डिव्हाइसवर म्हणजेच लॅपटॉप किंवा कंप्युटरवर व्हॉट्सअ‍ॅपचा वापर करू शकता.
मल्टी-डिव्हाइस सपोर्ट हे एक फीचर व्हॉट्सअ‍ॅपच्या बीटा व्हर्जनवर आहे. अँड्रॉइड आणि आयओएस वापरकर्ते या फीचरचा वापर करून मोबाईल डेटा नसतानाही आपल्या लॅपटॉप आणि इतर डिव्हाइसवर व्हॉट्सअ‍ॅपचा वापर करू शकतात. वापरकर्ते हे फीचर वापरून एकाच वेळी चार डिव्हाइसवर व्हॉट्सअॅप सुरु करून चॅट करू शकतात. विशेष म्हणजे यासाठी आपल्या फोनमध्ये इंटरनेट कनेक्शन असण्याची आवश्यकता नाही.
आपण या फीचरच्या मदतीने लॅपटॉप, कंप्यूटर, मॅक किंवा फेसबुक पोर्टल यासारख्या प्लॅटफॉर्म्स किंवा डिव्हाइसवर लॉगिन करून मेसेज पाठवू किंवा मिळवू शकता. व्हॉट्सअ‍ॅपने सेकंडरी डिव्हाइसवरही त्याचे एंड-टू-एंड एनक्रिप्शन फीचर लागू केले आहे, जेणेकरून व्हॉट्सअॅप किंवा कोणताही तृतीय पक्ष तुमचे संदेश वाचू किंवा पाहू शकत नाही.
या फीचरचा सुरुवातीला वापर करताना तुम्हाला तुमचा स्मार्टफोन सेकंडरी डिव्हाइसच्या आजूबाजूला ठेवणे आणि फोनमध्ये इंटरनेट कनेक्शन असणे गरजेचे होते. पण नव्या अपडेटमुळे सेकंडरी डिव्हाइसवर व्हॉट्सअ‍ॅपचा वापर करत असताना आपला स्मार्टफोन आजूबाजूला नसेल आणि त्यात इंटरनेट कनेक्शन नसेल, तरीही काही हरकत नाही. याचा फायदा असा की आपला फोन बंद असला, तरीही आपण इतर डिव्हाइसवर व्हॉट्सअ‍ॅपचा वापर करू शकतो.
इतर डिव्हाइससोबत आपल्या व्हॉट्सअॅप अकाउंटला लिंक करण्यासाठी सर्वातआधी आपले व्हॉट्सअॅप नवीन व्हर्जनसोबत अपडेट करावे. आपल्या फोनवर यानंतर व्हॉट्सअॅप उघडावे आणि स्क्रीनच्या उजव्या बाजूला सर्वात वर तीन डॉट असतील, त्यावर क्लिक करून समोर आलेल्या मेन्यूमधील ‘लिंक्ड डिव्हाइस’ हा पर्याय दिसेल.
त्यानंतर ‘लिंक्ड डिव्हाइस’ या पर्यायावर क्लिक करा आणि नंतर ‘लिंक डिव्हाइस’ खाली तुम्हाला ‘मल्टी-डिव्हाइस बीटा’ पर्याय दिसेल. हा पर्याय तुम्ही निवडताच तुम्हाला ‘जॉइन बीटा’चा पर्याय दिसेल. तुम्ही हा पर्याय कधीही बंद करू शकता. आपल्याला यानंतर पुन्हा एकदा फोनवरून आपले डिव्हाइस स्कॅन करावे लागेल. अशाप्रकारे तुम्ही व्हॉट्सअ‍ॅपचे हे फीचर सक्रिय करू शकता. हे फीचर सध्या व्हॉट्सअ‍ॅपच्या बीटा व्हर्जनसाठी सुरु करण्यात आले आहे. तुम्ही जर कोणत्याही डिव्हाइसवरून एखादा मेसेज डिलीट केला, तर दुसऱ्या कोणत्याही डिव्हाइसवर आपल्याला तो मेसेज पाहता येणार नाही. हे फीचर अद्याप आयफोनसाठी उपलब्ध नाही.