महाराष्ट्र २४ । विशेष प्रतिनिधी । दि.२१ मार्च । सर्वसामान्य लोकांवर आता महागाईचा बोजा वाढणार आहे. बहुतांश एफएमसीजी कंपन्या आपल्या उत्पादनांच्या किमती पुन्हा १०-१५% पर्यंत वाढवण्याच्या विचारात आहेत. गहू, पाम तेल आणि पॅकेजिंग सामग्रीच्या महागाईमुळे कंपन्या आपल्या उत्पादनांच्या किमती वाढवत आहेत. याशिवाय रशिया-युक्रेन युद्धामुळेही कंपन्यांवर दबाव आहे.
युद्धामुळे गहू, खाद्यतेल आणि कच्च्या तेलाच्या किमतीत वाढ होईल. डाबर आणि पारले यासारख्या कंपन्या महागाई कमी करण्यासाठी किमतीत किरकोळ वाढ करतील. एफएमसीजी कंपन्यांनी फेब्रुवारीत साबण, डिटर्जंट, टूथपेस्ट, शाम्पू, चहा, कॉफी, बिस्कीट, नूडल्स आणि ज्यूससारख्या उत्पादनांच्या किमती वाढवल्या होत्या. या कंपन्यांनी कमोडिटीच्या किमतीतील वाढीचे ओझे ग्राहकांवर टाकले आहे. एफएमसीजी उद्योगाशी संबंधित सूत्रांनुसार, गेल्या वेळी कंपन्यांनी पूर्णपणे कमोडिटी भाववाढ ग्राहकांवर टाकली नव्हती. तेव्हा कोविडनंतर मागणी वाढली होती हे त्यामागचे कारण आहे. आता सर्व कंपन्या १०-१५% किंमत वाढवत आहेत. नुकतेच ब्रेंट क्रूडचे दर १३९.१३ डॉलर प्रतिबॅरल होऊन सुमारे १३ वर्षे ८ महिन्यांच्या उच्च पातळीवर पोहोचले होते. आता यात घट होऊन १०० डॉलर प्रतिबॅरलखाली आले आहेत.