महाराष्ट्र २४ । विशेष प्रतिनिधी । दि.२५ मार्च । महाराष्ट्र राज्य परिवहन महामंडळाच्या गाडीमधून प्रवास करणाऱ्या प्रवाशांसाठी स्मार्ट कार्ड योजना राबवली जात आहे. मात्र, कर्मचाऱ्यांचा संप आणि करोना पार्श्वभूमी लक्षात घेता प्रवाशांना स्मार्ट कार्ड प्राप्त करून घेण्यासाठी दोन महिने मुदतवाढ देण्यात आली आहे. १ जूनपासून ज्येष्ठ नागरिकांना प्रवासभाड्यात सवलत हवी असेल तर स्मार्ट कार्ड बंधनकारक करण्यात आले आहे. याबाबतचा निर्णय महाराष्ट्र राज्य परिवहन मंडळाने नुकताच घेतला आहे.
महाराष्ट्र राज्य परिवहन महामंडळाकडून जेष्ठ नागरिक तसेच अनेक प्रवाशांना प्रवास भाड्यामध्ये सूट दिली जाते. यासाठी जुने ओळखपत्र ग्राह्य धरले जातात. जुन्या ओळखपत्रावर अनेक वेळा गैरप्रकार होण्याची शक्यता नाकारता येत नसल्याने याला आळा घालण्यासाठी महामंडळ प्रशासनाकडून प्रवाशांना स्मार्ट कार्ड देण्याचा निर्णय घेण्यात आला आहे.
स्मार्ट कार्ड प्राप्त करून घेण्यासाठी ३१ मार्च २०२२ पर्यंत मुदत देण्यात आली होती. मात्र, महाराष्ट्र राज्य परिवहन मंडळाच्या कर्मचाऱ्यांनी २८ ऑक्टोबर २०२१ पासून पुकारलेल्या संपामुळे आणि कोरोना विषाणूचा प्रादुर्भाव लक्षात घेता स्मार्ट कार्ड वाटपासाठी दोन महिने म्हणजेच ३१ मेपर्यंत मुदतवाढ देण्यात आली आहे. दोन महिन्यात प्रवासभाड्यात सवलत घेण्यासाठी पात्र असलेल्या प्रवाशांना स्मार्ट कार्ड प्राप्त करून घ्यावे लागणार आहे. अन्यथा १ जूनपासून ज्येष्ठ नागरिक तसेच इतर पात्र प्रवाशांना स्मार्ट कार्ड नसेल तर महाराष्ट्र राज्य परिवहन महामंडळाच्या गाडीमधून प्रवासभाड्यात देण्यात येणाऱ्या सवलतीला मुकावे लागणार आहे.
इतकंच नाहीतर, आगारास प्राप्त झालेली स्मार्टकार्ड तातडीने संबंधितांना वाटप करावेत आगारात कोणत्याही लाभार्थ्याचे स्मार्टकार्ड शिल्लक राहणार नाही, याची खबरदारी घ्यावी अशा सूचना एसटी महामंडळात प्रशासनाकडून देण्यात आल्या आहेत.