महाराष्ट्र २४ । विशेष प्रतिनिधी । दि.७ एप्रिल । राज ठाकरे यांनी गुढीपाडवा मेळाव्यात मशिदींवरील भोंग्यांसदर्भात घेतलेल्या भूमिकेला ठामपणे विरोध दर्शविणारे मनसेचे नेते वसंत मोरे यांना मोठा झटका लागला आहे. राज ठाकरे यांनी वसंत मोरे (Vasant More) यांची पुणे शहराध्यक्षपदावरून उचलबांगडी केली आहे. आता त्यांच्याजागी साईनाथ बाबर (Sainath Babar) यांची पुणे शहराध्यक्षपदी नियुक्ती करण्यात आली आहे. गेल्या दोन दिवसांपासून वसंत मोरे यांनी राज ठाकरे यांच्याविरोधात घेतलेल्या भूमिकेची जोरदार चर्चा होती. त्यामुळे राज ठाकरे हे वसंत मोरे यांच्यावर नाराज असल्याचे सांगितले जात होते. हा अंदाज अखेर खरा ठरला आहे.
महाराष्ट्र नवनिर्माण सेनेचे अध्यक्ष मा. श्री. राजसाहेब ठाकरे यांच्या आदेशाने आज नगरसेवक श्री. साईनाथ संभाजी बाबर यांची पक्षाच्या पुणे शहर अध्यक्षपदी नियुक्ती करण्यात आली आहे. नव्या जबाबदारीसाठी श्री. साईनाथ बाबर यांचे मनःपूर्वक अभिनंदन आणि भावी राजकीय वाटचालीसाठी शुभेच्छा! pic.twitter.com/Egqw962ZIx
— MNS Adhikrut – मनसे अधिकृत (@mnsadhikrut) April 7, 2022
वसंत मोरे यांच्या भूमिकेनंतर मनसेच्या गोटात वादळ निर्माण झाले होते. या पार्श्वभूमीवर राज ठाकरे यांनी गुरुवारी शिवतीर्थवर पुण्यातील पदाधिकाऱ्यांची बैठक बोलावली होती. या बैठकीला बाबू वागस्कर, अनिल शिदोरे, नगरसेवक साईनाथ बाबर यांना बोलावण्यात आले होते. तर वसंत मोरे यांना निमंत्रण देण्यात आले नव्हते. तेव्हाच वसंत मोरे यांच्यावर पक्षाकडून कारवाई होणार, याची कुणकुण लागली होती.
वसंत मोरेंनी मनसेचा व्हॉटसअॅप ग्रूप सोडला
या सगळ्या घटनाक्रमानंतर वसंत मोरे हे देखील मनसेतून बाहेर पडणार असल्याच्या चर्चा सुरु झाल्या आहेत. पुण्यातील उपविभाग प्रमुख, उपशहर प्रमुक आणि इतर मनसे पदाधिकाऱ्यांसाठी तयार करण्यात आलेल्या व्हॉटसअॅप ग्रुपमधून वसंत मोरे बाहेर पडल्याचे समजते. वसंत मोरे यांनी राज ठाकरे यांच्या आदेशाविरुद्ध भूमिका घेतल्यानंतर या व्हॉटसअॅप ग्रूपवर जाहीरपणे मतभेद सुरू झाले होते. त्यामुळे वाद टाळण्यासाठी वसंत मोरे स्वत:हून या ग्रुपमधून बाहेर पडल्याचे सांगितले जाते.