महाराष्ट्र २४। विशेष प्रतिनिधी । दि.२४ एप्रिल । सर्वच प्रवासी परतल्याने बसस्थानकांत प्रवाशांचीही गर्दी वाढायला लागली आहे. त्यातच मुलांना उन्हाळी सुट्या व ३ मे रोजी असलेल्या अक्षय्य तृतीयेमुळे शनिवारी दिवसभर बसस्थानकांत गर्दी होती. शनिवारी एसटी विभागात ३ हजार ५०० फेऱ्यांद्वारे सव्वा लाख प्रवाशांची वाहतूक करण्यात आली. यातून एसटीने २ लाख ३० हजार किलोमीटर लालपरी धावून एसटीला ६२ लाखांचे उत्पन्न मिळाले.
एसटीचे सर्व संपकरी कर्मचारी कामावर परतल्यानंतर दररोज प्रवाशांची संख्या वाढत आहे. यात शुक्रवारी २२ एप्रिल रोजी ६१२ नियते, २७९० फेऱ्या, २ लाख २१ हजार किलोमीटर, तर एक लाख ९ हजार ९२८ प्रवाशांनी प्रवास केला होता. तर दुसऱ्याच दिवशी म्हणजे शनिवारी २३ एप्रिल रोजी साडेतीन हजार फेऱ्या, दोन लाख तीस हजार किलोमीटर एसटी फिरली. सव्वा लाख प्रवाशांनी प्रवास करत एसटीला ६२ लाख रुपयांचे उत्पन्न मिळाले.
लांब पल्ल्याऐवजी कमी अंतराच्या फेऱ्यांना प्राधान्य : महामंडळातर्फे सरसकट आंतर प्रादेशिक लांब पल्ल्याच्या फेऱ्यांमध्ये वाढ करण्याऐवजी कमी अंतराच्या फेऱ्यांना प्राधान्य देण्याचे नियोजन आहे. यात उपलब्ध चालक-वाहकांचा जास्तीत जास्त वापर करून फेऱ्यांचे नियोजन केले आहे.