महाराष्ट्र २४। विशेष प्रतिनिधी । दि.२४ एप्रिल । पंतप्रधान नरेंद्र मोदी यांनी रविवारी पहिला ‘लता दीनानाथ मंगेशकर’ पुरस्कार स्वीकारला. येथील षण्मुखानंद सभागृहात आयोजित एका भव्य सोहळ्यात त्यांना हा पुरस्कार प्रदान करण्यात आला. यावेळी महाराष्ट्राचे राज्यपाल भगतसिंह कोश्यारी, उद्योग मंत्री सुभाष देसाई व विरोधी पक्षनेते देवेंद्र फडणवीस आदी नेत्यांसह संपूर्ण मंगेशकर कुटुंबिय उपस्थित होते. लतादीदींचे बंधू ह्रदयनाथ मंगेशकर प्रकृतीच्या कारणास्तव या सोहळ्यापासून दूर राहिले. भारत रत्न लता मंगेशकर यांच्या स्मरणार्थ हा पुरस्कार दिला जात आहे. या पुरस्काराचे यंदाचे हे पहिलेच वर्ष आहे. कला क्षेत्रातील अनेक दिग्गजाची या सोहळ्याला उपस्थिती होती.
उद्धव ठाकरे यांची सोहळ्याला दांडी
गत काही दिवसांपासून हिंदुत्वाच्या मुद्यावरुन भाजपने शिवसेनेला चांगलेच कोंडीत पकडले आहे. विशेषतः या प्रकरणी त्यांनी मुख्यमंत्री उद्धव ठाकरे यांच्यावर तिखट हल्ला चढवला आहे. या पार्श्वभूमीवर या सोहळ्याच्या निमित्ताने मोदी व उद्धव ठाकरे एका व्यासपीठावर येण्याची चर्चा होती. पण, उद्धव यांनी या कार्यक्रमापासून अंतर राखले. ते राणा दाम्पत्याच्या कथित हनुमान चालिसा विरोधात ‘मातोश्री’बाहेर आंदोलन करणाऱ्या चंद्रभागा शिंदे नामक एका 80 वर्षीय वयोवृद्ध महिलेला भेटण्यासाठी तिच्या घरी गेले आहेत.
षण्मुखानंद हॉलमध्ये सोहळा
मंगेशकर कुटूंबियांनी 32 वर्षांपूर्वी दीनानाथ मंगेशकर प्रतिष्ठान, पुणे या चॅरिटेबल ट्रस्टची स्थापना केली होती. या प्रतिष्ठानतर्फे दरवर्षी संगीत, नाटक, कला, वैद्यकीय, आणि सामाजिक क्षेत्रात उल्लेखणीय कामगिरी करणाऱ्या व्यक्तींना पुरस्कार देऊन सन्मानित केले जाते. यंदाचा पुरस्कार वितरण सोहळा रविवारी मुंबईतील श्री षण्मुखानंद हॉलमध्ये होईल. त्यात पंतप्रधान मोदींना पहिला लता मंगेशकर पुरस्कार प्रदान केला जाईल. लता दीदींचे गत 6 फेब्रुवारी रोजी निधन झाले होते. त्यांच्या स्मरणार्थ त्यांच्या यंदापासून हा पुरस्कार दिला जात आहे.