महाराष्ट्र २४ । विशेष प्रतिनिधी । दि. १९ ऑगस्ट । देशातील प्रसिद्ध स्टँड-अप कॉमेडियन राजू श्रीवास्तव यांची प्रकृती गंभीर (Raju Srivastava Health Update) आहे. १० ऑगस्ट रोजी हृदयविकाराचा झटका आल्याने राजू यांना गेल्या आठवडाभरापासून नवी दिल्लीतील एम्समध्ये दाखल करण्यात आले आहे. त्यांची तब्येत आणखी खालावल्याच्या बातम्या गुरुवारी समोर आल्या होत्या, मात्र यातूनही काहीतरी चमत्कार घडेल अशी अपेक्षा चाहते व्यक्त करत आहेत. दरम्यान, त्यांची पत्नी शिखा श्रीवास्तव (Raju Srivastava Wife) यांनी ETimes TV शी बोलताना अशी प्रतिक्रिया दिली की राजू यांची प्रकृती स्थिर आहे. अफवा न पसरवण्याचे आवाहन त्यांनी केले आहे कारण ही बाब अत्यंत त्रासदायक आहे.
त्यांच्या पत्नी म्हणाल्या, ‘राजू यांची प्रकृती स्थिर आहे आणि डॉक्टर त्यांचे काम योग्यपणे करत आहेत. राजू लवकरात लवकर बरे व्हावेत यासाठी संपूर्ण व्यवस्थापन दिवसरात्र काम करत आहे. आमचा त्यांच्यावर पूर्ण विश्वास आहे आणि राजूजी हे लढवय्ये आहेत आणि ते ही लढाई जिंकतील. ते संघर्ष करतील आणि तुम्हा सर्वांचे मनोरंजन करण्यासाठी परत येईल, हे माझे तुम्हा सर्वांना वचन आहे.
शिखा पुढे म्हणाल्या की, ‘आम्हाला शुभेच्छा, आशीर्वाद मिळत आहेत आणि बरेच लोक त्यांच्या आरोग्यासाठी प्रार्थना आणि पूजा करत आहेत. मला माहीत आहे या प्रार्थना व्यर्थ जाणार नाही. मला फक्त सर्वांना विनंती करायची आहे की त्यांनी त्यांच्या आरोग्यासाठी प्रार्थना करावी.’
डॉक्टरांनी हार मानून ते आता एखाद्या चमत्काराच्या प्रतीक्षेत आहेत, असेही बोलले जात होते. त्यावर बोलताना शिखा म्हणाल्या की, ‘डॉक्टर हे पृथ्वीवर देवाच्या रूपात आहेत. ते खूप चांगले काम करत आहेत, त्यांनी हार मानल्याच्या अफवा निराधार आहेत. गोष्टी घडत आहेत. आम्हाला संघर्ष करावा लागेल आणि धीराने वाट पहावी लागेल. डॉक्टर आणि राजूजी दोघेही लढत आहेत आणि त्याचा सकारात्मक परिणाम लवकरच सर्वांना कळेल.’ त्या पुढे म्हणाल्या की, ‘मी वचन देते की राजू सर्वांचे मनोरंजन करण्यासाठी परत येतील.’ त्यांच्या तब्येतीबद्दल अफवा न पसरवण्यााची विनंती त्यांनी केली आहे. कारण कुटुंब खूप भावनिक अवस्थेत आहे आणि हे सर्वांसाठी खूप त्रासदायक होते आहे.
शिखा असं म्हणाल्या की, ‘मी हात जोडून लोकांना विनंती करते की कृपया राजू यांच्या तब्येतीबाबत अफवा पसरवणे थांबवा. या अफवांमुळे कुटुंब, डॉक्टर आणि सगळेच नैतिकदृष्ट्या खचले आहेत. ते त्यांचे सर्वोत्तम प्रयत्न करत आहेत आणि त्यांच्यावर नकारात्मकतेचा प्रभाव पडू नये अशी आमची इच्छा आहे. आत्ता आम्हाला प्रार्थनांची गरज आहे आणि नकारात्मक बातम्या पसरवणे थांबवा. या अफवा खूप त्रासदायक आहेत.’