महाराष्ट्र २४ । विशेष प्रतिनिधी । दि. १९ ऑगस्ट । दोन वर्षांनंतर उत्साहात साजऱ्या होणाऱ्या दहीहंडीनिमित्त आज, शहरातील वाहतुकीत बदल करण्यात आला आहे. सायंकाळी शहराच्या मध्यवर्ती भागातील प्रमुख रस्त्यांऐवजी पर्यायी मार्गांचा वापर करावा, असे आवाहन वाहतूक पोलिसांनी केले आहे. शिवाजी रस्ता, मंडई, बाजीराव रस्ता, लक्ष्मी रस्ता, टिळक रस्ता येथील वाहतूक नियोजनात बदल करण्यात आला आहे.
शहराच्या मध्यवर्ती भागात दहीहंडी पाहण्यासाठी नागरिकांची मोठी गर्दी होते. करोनामुळे दोन वर्षे हा उत्सव न झाल्याने य़ंदा गर्दी वाढण्याची शक्यता आहे. या पार्श्वभूमीवर वाहतूक कोंडी होऊ नये; तसेच नागरिकांची गैरसोय टाळण्यासाठी सायंकाळी पाच वाजल्यापासून प्रमुख रस्त्यांवरील वाहतूक बंद ठेवण्यात येणार आहे. सायंकाळनंतर वाहनचालकांनी पर्यायी रस्त्यांचा वापर करावा, असे आवाहन वाहतूक शाखेचे पोलिस उपायुक्त राहुल श्रीरामे यांनी केले आहे.
शिवाजी रस्ता, लक्ष्मी रस्ता, बाजीराव रस्ता, टिळक रस्ता या रस्त्यांवर दर वर्षीप्रमाणे यंदा विविध दहीहंडी उत्सव मंडळांकडून दहीहंडी साजरी केली जाणार आहे. मजूर अड्डा चौक (बुधवार चौक) ते दत्तमंदिर चौक, बेलबाग चौक ते सेवासदन, मजूर अड्डा चौक ते अप्पा बळवंत चौक, महात्मा फुले मंडई, महाराष्ट्र साहित्य परिषद, नवी पेठ या ठिकाणी होणाऱ्या दहीहंडी उत्सवासाठी मोठी गर्दी होण्याची शक्यता आहे.
पर्यायी मार्ग
– शिवाजी रस्त्यावरून स्वारगेटच्या दिशेने जाणाऱ्या वाहनांनी स. गो. बर्वे चौकातून जंगली महाराज रस्त्याने टिळक चौक आणि टिळक रस्ता किंवा लाल बहादूर शास्त्री रस्त्याने इच्छित स्थळी जावे.
– पूरम चौकातून बाजीराव रस्त्याने जाणाऱ्या वाहनचालकांनी टिळक रस्ता, टिळक चौक, गोपाळ कृष्ण गोखले रस्ता या मार्गाने जावे.
– स. गो. बर्वे चौकातून महापालिकेकडे जाण्यासाठी जंगली महाराज रस्त्याने झाशी राणी चौकमार्गे जावे.
– मजूर अड्डा चौकातून अप्पा बळवंत चौकाकडे एकेरी वाहतूक सुरू असेल. अप्पा बळवंत चौकातून बाजीराव रस्त्याने शनिवारवाड्याकडे जाता येईल.
– रामेश्‍वर चौक ते शनिपार चौक आणि सोन्या मारुती चौकाकडून लक्ष्मी रस्त्याने सरळ सेवासदनकडे जाणारी वाहतूक पूर्ण बंद असेल. सोन्या मारुती चौकातून उजवीकडे वळून फडके हौद चौकातून इच्छित स्थळी जाता येईल.
– वीर गोगादेव उत्सवामुळे कॅम्प परिसरातील वाहतुकीतही बदल करण्यात आला आहे.