महाराष्ट्र २४ । विशेष प्रतिनिधी । दि. १९ ऑगस्ट । भाजपचे नेते किरीट सोमय्या यांच्या पत्नी मेधा सोमय्या यांनी दाखल केलेल्या मानहानीच्या खटल्यात शिवसेना खासदार संजय राऊत यांनी स्वत:चा बचाव केला आहे. या प्रकरणी मी दोषी नसून माझ्यावरील आरोप खोटे व निराधार आहेत, असा दावा त्यांनी गुरुवारी केला. राऊत हे सध्या मनी लाँड्रिंग प्रकरणात न्यायालयीन कोठडींतर्गत आर्थर रोड तुरुंगात असल्याने त्यांनी व्हिडीओ कॉन्फरन्सिंगद्वारे (व्हीसी) न्यायालयात म्हणणे मांडले.
‘मिरा-भाइंदर महापालिका क्षेत्रात सार्वजनिक शौचालयांची उभारणी व देखभालीच्या प्रकल्पात शंभर कोटी रुपयांचा घोटाळा झाला आणि त्यात सोमय्या कुटुंबीयांच्या युवा प्रतिष्ठान संस्थेचा सहभाग आहे, असा आरोप करून राऊत यांनी माझी मानहानी केली’, असा दावा करत मेधा यांनी राऊत यांच्याविरोधात फौजदारी तक्रार दाखल केली आहे. राऊत यांची वक्तव्ये सकृतदर्शनी मानहानीकारक आहेत, अशी टिप्पणी करत शिवडी महानगर न्यायदंडाधिकारी न्यायालयाने राऊत यांना न्यायालयात हजर राहण्याचे निर्देश पूर्वी दिले होते.
राऊत यांना न्यायालयात हजर करण्यासाठी प्रॉडक्शन वॉरंट काढावे, अशी विनंती मेधा सोमय्या यांच्यातर्फे अॅड. विवेकानंद गुप्ता यांनी गुरुवारच्या सुनावणीत केली. तर राऊत हे सध्या न्यायालयीन कोठडींतर्गत आर्थर रोड तुरुंगात असल्याचे त्यांचे वकील अॅड. सनी जैन यांनी सांगितले. त्यानंतर न्यायाधीशांनी राऊत यांना ‘व्हीसी’द्वारे हजर करण्याचे निर्देश दिले. त्यानुसार तुरुंग प्रशासनाने राऊत यांना न्यायालयासमोर हजर केल्यानंतर आरोप मान्य आहेत का, अशी विचारणा न्यायाधीशांनी त्यांना केली. तेव्हा, ‘मला माझ्या वकिलांशी चर्चा करण्याची संधी मिळाली नाही’, असे सांगत आरोप अमान्य असल्याचे ते म्हणाले. त्यानंतर राऊत यांना त्यांच्या वकिलांनीही तोच प्रश्न विचारला असता, आपल्यावरील आरोप निराधार व खोटे असल्याचा दावा राऊत यांनी केला.