महाराष्ट्र २४ – ऑनलाईन -पुणे – विशेष प्रतिनिधी – ओमप्रकाश भांगे -: पुण्याच्या बी. जे. मेडिकल कॉलेज व ससून रुग्णालयातील बाधित रुग्णांवर प्रयोगास सुरुवात झाली आहे. मध्यम स्वरुपाची लक्षणे असलेल्या ६० रुग्णांची या प्रयोगासाठी निवड करण्यात आली असून, त्यातील दोघा रुग्णांना इंजेक्शनद्वारे लस देण्यात आली आहे ,लहान बालकाला दिल्या जाणाऱ्या ‘बीसीजी’ लशीचा प्रयोग करोनाबाधितावर करण्यासाठी हाफकिन संस्थेने पुढाकार घेतला आहे. टप्प्याटप्प्याने या प्रयोगातील बदल टिपले जाणार आहेत. राज्यातील करोनाबाधितांवरील बीसीजी लशीचा हा पहिलाच प्रयोग ठरला आहे.
‘आयसीएमआर’च्या आदेशानुसार सुरत, त्रिवेंद्रम, जयपूर आणि पुण्यातील बी. जे. मेडिकल कॉलेजमध्ये ‘प्लाझ्मा थेरपी’चा प्रयोग करण्यात येत आहे. त्या पाठोपाठ मुंबईच्या हाफकिन इन्स्टिट्यूटला ‘आयसीएमआर’ने ‘बीसीजी’ लशीचा प्रयोग करण्याची परवानगी दिली आहे. हा प्रयोग हाफकीन संस्थेसह बी. जे. मेडिकल कॉलेजही करीत आहे. या संदर्भात ससून रुग्णालयातील करोनाबाधित रुग्णांना ‘बीसीजी’ लस देण्यास सुरुवात झाली आहे. ‘बीसीजी’ ही लस इंजेक्शनद्वारे दिली जाते. या प्रयोगासाठी हाफकिन इन्स्टिट्यूटचे अधिकारी ससून रुग्णालयात येऊन गेले. हाफकिनच्या संस्थेला प्रयोग करण्यास ससूनमधील ‘इथिक्स कमिटी’ने परवानगी दिली आहे. त्याबाबत प्रशिक्षण देण्यात आले.
ससून रुग्णालयात करोनाबाधितांवर ‘बीसीजी’ लशीचा प्रयोग सुरू केला आहे. त्या सौम्य आणि अतिगंभीर स्वरुपाच्या रुग्णांना लस देण्याऐवजी मध्यम स्वरुपाच्या रुग्णांना देण्यात येत आहे. सौम्य स्वरुपाचे रुग्ण लवकर बरे होतात. तर गंभीर स्वरुपाच्या रुग्णांना लस दिल्यास त्याचा फायदा होईल की नाही हे सांगणे शक्य नसते. त्यामुळे या प्रयोगासाठी मध्यम स्वरुपाची लक्षणांच्या रुग्णांची निवड केली जाणार आहे.
डॉ. मुरलीधर तांबे, अधिष्ठाता, बी. जे. मेडिकल कॉलेज.