महाराष्ट्र २४ । विशेष प्रतिनिधी । दि . २३ नोव्हेंबर । नागरी उपयोगासाठीचे जगातील सर्वात मोठे विमान मंगळवारी मुंबईच्या छत्रपती शिवाजी महाराज आंतरराष्ट्रीय विमानतळावर उतरले. ‘एअरबस बेलुगा’ असं नाव असलेल्या या विमानाला पाहून विमानतळावर उपस्थित प्रवासीही अवाक् झाले.
एअरबस कंपनीचे ‘ए३००-६०० एसटी’ हे ‘बेलुगा’ नावे ओळखले जाणारे विमान ५१ टन मालवाहू क्षमतेसह जगातील सर्वात मोठे विमान आहे. वैमानिक खाली व विमानाचा मुख्य भाग त्याच्या डोक्यावर, तसेच खालील भागापेक्षा दुप्पटीने मोठी असलेली पाठ, अशा अत्यंत वेगळ्या आकारातील हे विमान आहे. ते मंगळवारी छत्रपती शिवाजी महाराज आंतरराष्ट्रीय विमानतळावर उतरले. त्यावेळी सारेच उपस्थित प्रवासी अवाक् झाले.
उपस्थित प्रवाशांना हे बहुचर्चित विमान पहिल्यांदाच बघता आले. याखेरीज प्रवासी वाहतुकीत जगात सर्वाधिक अत्याधुनिक असलेले ‘एम्ब्रेअर ई१९५-ई२’ (प्राफिट हंटर) हे विमानदेखील मंगळवारी मुंबईत आले. आकर्षक रंगसंगती व आगळ्या आलिशानतेसाठी हे विमान ओळखले जाते.
दरम्यान, नागरी उपयोगातील अॅन्तोनोव्ह कंपनीचे ‘एएन १२४’ व ‘एएन २२५’, ही दोन विमाने सर्वाधिक मोठी होती. या दोघांची सामान वाहून नेण्याची क्षमता अनुक्रमे १७१ व २५० टन आहे. या तोडीचे अन्य कुठलेही विमान आतापर्यंत अस्तित्वात नव्हते. ‘एएन २२५’ विमानाने दिल्ली मेट्रोसाठीचे डबे आणले गेले होते. ही दोन्ही विमाने भारतात विविध विमानतळांवर येऊन गेली आहेत.