महाराष्ट्र २४ । विशेष प्रतिनिधी । दि . १ डिसेंबर । श्रद्धा वालकर हत्या प्रकरणातील मुख्य आरोपी असलेल्या आफताब पुनावालाची पॉलिग्राफ चाचणी करण्यात आली आहे. आज त्याची नार्को चाचणी करण्यात येईल. श्रद्धाला अतिशय निर्घृणपणे संपवणाऱ्या आफताबला त्याच्या कृत्याबद्दल कोणताच पश्चाताप नाही. तो तुरुंगात, चौकशीदरम्यान अतिशय शांत आणि थंड असतो. त्याच्या चेहऱ्यावर कोणत्याही प्रकारचा तणाव जाणवत नाही. आफताब इतका थंड कसा काय, असा प्रश्न पोलिसांना पडला होता. त्याचं उत्तर अखेर मिळालं आहे.
लिव्ह इन पार्टनर असलेल्या श्रद्धाची हत्या केल्यानंतर आफताबनं मानवी वर्तनाबद्दल इंटरनेटवर सर्च केलं. अशाच प्रकारच्या जुन्या घटना, हत्या प्रकरणाचे चाललेले खटले याबद्दलची माहिती त्यानं इंटरनेटवर शोधली. सेलिब्रिटी त्यांच्याविरोधात खटले सुरू असताना त्यांची वर्तणूक कशी होती याबद्दलचं वाचनदेखील त्यानं इंटरनेटवर केलं.
हॉलिवूडमधील सेलिब्रिटी जोडपं जॉनी डेप आणि अँबर हर्ड यांच्या घटस्फोटाच्या खटल्याबद्दलची माहिती आफताबनं वाचून काढली. एखाद्याची वर्तणूक तपासावर कशाप्रकारे परिणाम करते याची माहितीही त्यानं वाचली आहे. श्रद्धाच्या हत्या प्रकरणात आपल्याला कधी ना कधी अटक होणार याची कल्पना आफताबला होती. त्यासाठीची तयारी आफताबनं आधीच केली होती.
पोलीस कोठडीत असणाऱ्या आफताबच्या थंड वागणुकीची चर्चा सोशल मीडियावर सुरू आहे. आफताबच्या वर्तणुकीमागचं कारण त्याच्या इंटरनेट सर्च हिस्ट्रीमध्ये दडलेलं आहे. हत्येनंतर इंटरनेटवर वाचलेल्या अनेक गोष्टींमुळेच आफताब चौकशीदरम्यान अतिशय निश्चिंतपणे वागताना दिसत आहे. हत्या प्रकरणाच्या तपासापासून खटल्यापर्यंतच्या घडामोडींमध्ये आरोपीच्या वर्तनाचा नेमका काय काय परिणाम होतो, याबद्दल आफताबनं सखोल माहिती मिळवली आहे.
आफताबच्या मोबाईलमधील सर्चवर नजर टाकल्यास बऱ्याचशा गोष्टी वर्तणुकीबद्दलच्या आहेत. तणावपूर्ण काळात माणसांची वर्तणूक कशी असते. डेप आणि हर्डच्या घटस्फोटाच्या खटल्याचा आफताबनं अतिशय बारकाईनं अभ्यास केला. वर्तणुकीचा परिणाम तपासावर कसा होतो, याबद्दलची माहिती त्यानं वाचली होती, असं पोलीस दलातील सुत्रांनी सांगितलं. हत्या प्रकरणात दोषी ठरलेल्या आणि निर्दोष ठरलेल्या व्यक्तींची वर्तणूक कशी होती, याचा बराच अभ्यास आफताबनं केला आहे.