महाराष्ट्र २४ । विशेष प्रतिनिधी । २७ डिसेंबर । राज्यात शिंदे-भाजप सरकार स्थापन झाल्यापासून शिंदे गटातील काही नेते आणि भाजप आमदारांमध्ये अंतर्गत धूसफुस वाढली आहे. अशातच येत्या विधानसभा निवडणूकीत शिंदे गटाचे आमदार अनिल बाबर हे आपल्या मतदारसंघातून निवडणूक लढवणार नाही, असा गौप्यस्फोट भाजप आमदार गोपीचंद पडळकर यांनी केला आहे. (Maharashtra Political News)
शिंदे गटातील आमदार अनिल बाबर हे खानापूर-आटपाडी मतदारसंघातून निवडून आलेले आहेत. मात्र, २०२४ मध्ये या मतदारसंघावर भाजपचा उमेदवार असेल, असा दावा पडळकरांनी (Gopichand Padalkar) केला आहे. त्यांच्या या दाव्याने राजकीय चर्चांना उधाण आलं आहे.
भाजपा आमदार गोपीचंद पडळकर यांनी नुकतीच खानापूर तालुक्यातील मोही येथील ग्रामपंचायतीत हजेरी लावली. यावेळी त्यांनी ग्रामपंचायत निवडणुकीत विजयी झालेल्या सरपंच आणि सदस्यांच्या सत्कार केला. यावेळी बोलताना पडळकरांनी हा गौप्यस्फोट केला आहे. (Latest Marathi News)
काय म्हणाले गोपीचंद पडळकर?
मी 2019 मध्ये बारामती विधानसभा मतदारसंघातून निवडणूक लढवली होती. त्यावेळी आमदार बाबर व त्यांचे पुत्र अमोल बाबर यांनी मला 2024 मध्ये तुमच्या पाठीशी उभे राहू, असा शब्द दिला होता. तो शब्द आता पिता-पुत्र पाळतील. बाबर हे खानापूर मतदारसंघातून 2024 ची निवडणूक लढवणार नाहीत, असं पडळकरांनी म्हटलं आहे.
अनिल बाबर भाजपात जाणार?
दरम्यान, गोपीचंद पडळकर यांनी केलेल्या या विधानावरून राजकीय वर्तुळात तर्क वितर्क लावले जात आहे. अनिल बाबर हे भाजपकडून लढणार की शिंदेंकडून? असा प्रश्न अनेकांना पडला आहे. आता पडळकरांच्या या विधानाला शिंदे गट काय उत्तर देणार हेच पाहणं महत्वाचं ठरेल.