महाराष्ट्र २४ । विशेष प्रतिनिधी । लक्ष्मण रोकडे । ६ जानेवारी । राष्ट्रवादी काँग्रेसचे अध्यक्ष शरद पवार यांनी पंतप्रधान नरेंद्र मोदी यांच्या एका विधानाचा उल्लेख करत आपण दिल्लीच्या संसदेत जाण्यास घाबरत असल्याचं म्हटलं आहे. पिंपरीत डी.वाय.पाटील मधे नुकतंच सूरू झालेल्या तिन दिवसीय जागतिक मराठी संमेलनाच्या कार्यक्रमात शरद पवारांनी हे विधान केलं आहे. या कार्यक्रमाला माजी मुख्यमंत्री सुशीलकुमार शिंदे यांच्यासह अनेक मान्यवर उपस्थित होते. या कार्यक्रमाप्रसंगी सुशीलकुमार शिंदे यांनीही आपलं मनोगत व्यक्त केलं.
यावेळी सुशीलकुमार शिंदे यांनी “मी शरद पवार यांच्या तालमीत तयार झालो” असं विधान केलं. याच विधाना वरून शरद पवारांनी पंतप्रधान मोदींना अप्रत्यक्ष टोला लगावला. त्यांनी नरेंद्र मोदी यांच्या एका विधानाचा उल्लेखही केला.
‘शरद पवारांच्या तालमीत तयार झालोय’ असं सुशीलकुमार शिंदे म्हणताच शरद पवार म्हणाले “मला भीती वाटतेय…”
शरद पवार आपल्या भाषणात म्हणाले, “आता बोलता-बोलता सुशीलकुमार शिंदे म्हणाले की, ‘मी शरद पवारांच्या तालमीत तयार झालो आहे.’ पण असं कोणी ही म्हटलं की मला भयंकर भीती वाटते. कारण याआधी कोणीतरी म्हटलं होतं की, मी शरद पवार यांचं बोट धरून राजकारणात आलोय. तेव्हापासून मी दिल्लीच्या संसदेत जाण्यासाठी घाबरतो,” असं विधान शरद पवारांनी केलं आहे. शरद पवारांच्या या विधानानंतर सभागृहात एकच हशा पिकला. त्यांनी पंतप्रधान नरेंद्र मोदी यांचं नाव न घेता हा टोला लगावला आहे. ते पिंपरी येथे आयोजित केलेल्या जागतिक मराठी संमेलनात बोलत होते.
यावेळी जेष्ठ अभिनेते मोहन आगाशे यांना जागतिक मराठी पुरस्काराने गौरविण्यात आले. या कार्यक्रमाला डॉ. पी. डी. पाटील, संमेलनाध्यक्ष डॉ. ज्ञानेश्वर मुळे, सुशीलकुमार शिंदे, अभिनेते सयाजी शिंदे, नागराज मंजुळे, खासदार श्रीनिवास पाटील आदी मान्यवर उपस्थित होते.