महाराष्ट्र २४ । विशेष प्रतिनिधी । २१ फेब्रुवारी । कसबा आणि चिंचवड विधानसभा पोटनिवडणुकीचा (Pune Bypoll Election) उत्साह शिगेला पोहोचला आहे. त्यातच चिंचवड विधानसभा मतदारसंघातील भाजपच्या उमेदवार अश्विनी जगताप (Ashwini Jagtap) यांना निवडणूक आयोगाने (Election Commission) नोटीस धाडली आहे. पेड न्यूज (Paid News) प्रकरणात ही नोटीस दिल्याचं निवडणूक विभागाकडून सांगण्यात आलं आहे.
पैसे देऊन बातमी प्रकाशित करण्यावरुन भाजप उमेदवार अश्विनी जगताप यांना नोटीस बजावण्यात आली आहे. एका वेबसाईट आणि साप्ताहिकामध्ये एक बातमी आलेली आहे, त्यातील मजकूर हा पेड न्यूज सदृश्य असल्याचे निदर्शनास आलेले आहे. यासाठी नेमण्यात आलेल्या माध्यम प्रमाणीकरण आणि सह नियंत्रण समिती अर्थात एमसीएमसीने याबाबत निवडणूक आयोगाला पत्र पाठवले. त्यानुसार अश्विनी जगताप यांना 16 फेब्रुवारीला नोटीस धाडण्यात आली असून 20 फेब्रुवारीला त्यांचा खुलासा आल्याचंही बोललं जात आहे. हा खुलासा आता एमसीएमसी समितीकडे पाठवण्यात आलेला आहे. आता ही समिती पडताळणी करुन पुढील कारवाई निश्चित करणार आहे. त्यामुळे आता निवडणूक आयोग काय कारवाई करणार हे पाहावं लागेल.