महाराष्ट्र २४ । विशेष प्रतिनिधी । दि . ३० मार्च । अमेरिकेचे अध्यक्ष जो बायडेन (US President Joe Biden) यांनी जागतिक बँकेच्या प्रमुख पदासाठी अजय बंगा (Ajay Banga) यांच्या नावाची शिफारस केली होती. भारतीय वंशाचे व पुणे शहरात जन्म झालेले अमेरिकन उद्योजक, अर्थतज्ज्ञ असलेले अजय बंगा आता जागतिक बँकेचे अध्यक्ष होणार आहे. त्यांची निवड बुधवारी जवळपास निश्चित झाली आहे. कारण त्यांच्याविरोधात या पदासाठी दुसरे कोणाचेही नाव आले नाही. अजय बंगा यांचे महाराष्ट्राशी आणि पुण्याशी नाते आहे. त्याबद्दल आता पुणेकरांना अभिमान वाटणार आहे. भारत सरकारने २०१६ मध्ये अजय बंगा यांना पद्मश्री देऊन सन्मानित केले होते.
मुदत संपण्यापूर्वी मालपास बाहेर
जागतिक बँकेचे विद्यमान प्रमुख डेव्हिड मालपास यांनी त्यांचा पाच वर्षांचा कार्यकाळ संपण्यापूर्वीच निवृत्तीची घोषणा केली होती. त्यांचा कार्यकाळ एप्रिल २०२४ मध्ये संपुष्टात येणार होता पण त्याआधीच त्यांनी पदमुक्त होण्याचा निर्णय घेतला. त्यामुळे त्यांच्या जागी अजय बंगा जागतिक बँकेचे सूत्र सांभाळणार आहे. कारण इतर कोणत्याही देशाने या पदासाठी उमेदवार जाहीर केला नाही. बुधवारी दावेदारीची मुदत संपली. यामुळे त्यांची निवड बिनविरोध होणार आहे.
बंगा यांचा जन्म पुण्यात
६३ वर्षीय बंगा यांचा जन्म महाराष्ट्रातील पुण्यात झाला. त्यांचे वडील हरभजनसिंग बंगा भारतीय लष्करात होते. ते लेफ्टनंट जनरल पदावरुन निवृत्त झाले. पुण्यातील खडकी कॅन्टोन्मेंट येथे तैनात होते, त्यावेळी अजय यांचा जन्म झाला. त्यांचे मूळ कुटंब पंजाबमधील जालंधरचे आहे. शालेय शिक्षणानंतर अजय बंगा यांनी दिल्लीच्या सेंट स्टीफन्स कॉलेजमधून अर्थशास्त्राची पदवी घेतली. त्यानंतर त्यांनी IIM अहमदाबादमधून एमबीए केले.
३० वर्षांचा अनुभव
जागतिक बँकेनं हवामान बदलाबाबत (Climate Change) ठोस पावलं उचलावी, यासाठीचा पाठपुरावा अमेरिका सातत्यानं करत आहे. त्याचवेळी अजय बंगा यांचं नाव अमेरिकेनं सूचवले आहे. त्यांनी दशकभराहून अधिक काळ मास्टरकार्ड या क्रेडीट कार्ड कंपनीचं नेतृत्त्व केलं. ते सध्या एका खासगी इक्विटीमध्ये काम करत आहेत. यापुर्वी सिटीग्रुपच्या अशिया-पॅसिपिक रिजनचे सीईओ होते.
नेस्लेमधून केली सुरुवात
1996 मध्ये सिटीग्रुपमध्ये जाण्यापुर्वी बंगा 1981 मध्ये नेस्ले कंपनीतून आपल्या करियरची सुरुवात केली. भारतात त्यांनी 13 वर्षे काम केले. पेप्सिकोमध्ये दोन वर्ष त्यांनी काम केले. त्याचबरोबर अमेरिकन रेड क्रॉस, क्राफ्ट फूड्स व Dow Inc.मध्येही त्यांनी काम केले. त्यांना सामाजिक विकास विषयात रुची आहे.
बाराक ओबामासोबत केले काम
2015 मध्ये तत्कालीन अमेरिकन राष्ट्राध्यक्ष बराक ओबामा यांच्याबरोबर त्यांनी काम केले. व्यापार धोरणासंदर्भात ते त्यांचे सल्लागार होते. जागतिक बँक जगभरातील 189 देशांचे नेतृत्व करते. बँकेच्या उद्देश जगभरातील गरिबीचे निर्मूलन करणे हा आहे.