महाराष्ट्र २४ । विशेष प्रतिनिधी । दि .०८ मे । महाराष्ट्रात उद्धव ठाकरे यांच्या नेतृत्वाखाली सरकार होते. काही लोक फुटले व बाजूला गेले. कशासाठी गेले, काय पदरात पडले हे त्यांचे त्यांना माहीत. पण तो त्यांचा निकाल महाराष्ट्रातील जनतेला पसंत पडलेला नाही. एकनाथ शिंदे यांचे सरकार झाले पण त्या शिंदेंच्या सरकारला समाजाचा पाठिंबा कितपत आहे याचा विचार आपल्याला करण्याची वेळ आली आहे, असं सांगतानाच शिंदे सरकारची इमेज कशी? याबद्दल एक प्रसंग शरद पवार यांनी सांगितला.
कसब्याचे नवनिर्वाचित आमदार रवींद्र धंगेकर यांचा सत्कार ज्येष्ठ नेते तथा राष्ट्रवादीचे अध्यक्ष शरद पवार, काँग्रेस प्रदेशाध्यक्ष नाना पटोले यांच्या हस्ते करण्यात आला. सांगोल्याच्या अन्नपूर्णाबाई होनराव नाट्यगृहात हा समारंभ पार पडला. यावेळी केलेल्या भाषणात भाजपला सत्तेपासून दूर ठेवण्यासाठी विरोधी पक्षांनी एकत्र येण्याची गरज पवारांनी बोलून दाखवली. यावेळी त्यांनी आवर्जून कसब्याचं उदाहरण देऊन विद्यमान शिंदे सरकारबद्दल जनतेच्या मनात असलेला रोष सांगितला.
सावंतवाडीची पोरं म्हणाली, आ गऐ गद्दार…
शरद पवार म्हणाले, गेल्या आठवड्यामध्ये माझे सावंतवाडीमध्ये शिक्षण क्षेत्रात काम करणारे एक निवृत्त मित्र सावंतवाडीला गेले व परत आले. मी त्यांना सहज विचारले की कोकणात काय परिस्थिती आहे. सरकार ज्यांच्या हातामध्ये आहे त्यांच्याबद्दल लोकांमध्ये काय भावना आहे?
त्यांनी सांगितले की सावंतवाडीमध्ये गेल्यानंतर रस्त्याने फिरायला जायला निघालो आणि तेव्हा रस्त्यावरून तिरंगा लावलेली सरकारी गाडी गेली तर शाळेतील मुलं ‘आ गए गद्दार, खोकेवाले आ गए’ असं म्हणायला लागली. लहान मुलांच्या तोंडात सुद्धा खोके आणि खोकेवाले हा शब्द बसलेला आहे.
शरद पवार यांनी हा किस्सा सांगताच लोकांनी टाळ्यांचा कडकडाट केला. त्यावर पवार म्हणाले, “येत्या काळात ज्या काही निवडणुका येतील त्या वेळी महाविकास आघाडीच्या पाठीशी अशीच शक्ती उभी करा आणि महाराष्ट्राचे राजकारण व देशाचे राजकारण योग्य रस्त्यावर आणण्यासाठी प्रयत्नांची पराकाष्ठा करा”
लोणार समाजातून आलेल्या रवींद्र धंगेकरांचं कर्तृत्व मोठं : पवार
सांगोला येथे आमदार रवींद्र धंगेकर यांच्या सन्मानासाठी आज आपण एकत्रित आलो. काँग्रेस, राष्ट्रवादी काँग्रेस, उद्धव ठाकरे यांच्या नेतृत्वातील शिवसेना, शेतकरी कामगार पक्ष आणि अन्य पक्ष या सर्वांना एकत्रित करून उद्याचा महाराष्ट्र योग्य रस्त्यावर नेण्याचे काम करण्याची तयारी आम्ही केली. या सगळ्यांचा उमेदवार पुणे शहरात रिक्त झालेल्या विधानसभा जागेवर लढण्यासाठी काँग्रेस पक्षाने दिला. रवींद्र धंगेकर, त्यांच्या सुविद्य पत्नी व त्यांच्याबद्दल आस्था असणारे सर्व बंधू-भगिनी इथे आले आहेत. अतिशय आनंद वाटणारा असा हा समारंभ आहे.
रवींद्र धंगेकर अतिशय लहान समाजातून आलेले आहेत. निवडणुका लढवणे सोपे नाही. पण कर्तृत्व असले, लोकांशी बांधिलकी असली की लोक लहान-मोठा बघत नाहीत. त्याचे उत्तम उदाहरण म्हणजे पुणे शहरात ज्या मतदारसंघात धंगेकरांची ५० सुद्धा मतं नाहीत त्या ठिकाणी हजारो मतांनी ते विजयी झाले आणि महाराष्ट्रात नवीन इतिहास तयार करण्याची कामगिरी त्यांनी केली. म्हणून त्यांच्या सत्कार करण्यासाठी आपण येथे आलो आहोत.
पुणे शहर हे देशातील महत्त्वाचे शहर आहे. सांस्कृतिक व शैक्षणिक राजधानी आहे. तिथले लोक विचारी आहेत. मला एक आनंद आहे की काँग्रेस पक्षाने रिक्त जागेसाठी रवींद्र धंगेकरांची निवड केली. पुणे शहरामध्ये आधी सांगितल्याप्रमाणे जातपात न बघता लोकांनी रवींद्र धंगेकर यांना पाठिंबा दिला. मी चौकशी केली. सर्वांनी सांगितले की हा उमेदवार असा आहे की मतदारसंघात किंवा शहरात समाजातील लहान माणसाचं दुखणं त्यांच्या कानावर आलं तर ते लगेच मोटारसायकलवर बसून जाणार व ते दुःख दूर करण्यासाठी जे काही शक्य असेल ते करणार. हे काम त्यांनी आयुष्यभर केले व त्याची नोंद पुणे शहरातील लोकांनीही घेतली. त्यामुळे मोठ्या मतांनी त्यांना विजयी करण्यात आले.