महाराष्ट्र २४ । विशेष प्रतिनिधी । दि. २४ जुन । फेब्रुवारी ते एप्रिल दरम्यान सर्वकालीन उच्चांकावर पोहचलेल्या सोन्याचा भाव आता उतरला आहे. सोन्या-चांदीच्या दरात आज घसरण झाली आहे. इंडिया बुलियन अँड ज्वेलर्स असोसिएशननुसार यंदाच्या आठवड्यात सोने प्रचंड स्वस्त झाले आहे. वर्षाच्या सुरुवातीला सोने-चांदीच्या किंमतीचा चढता आलेख पाहून सर्वसामान्यांना धडकी भरली होती. २४ कॅरेट शुद्ध सोन्याने ६० हजार रुपयांचा पल्ला गाठला होता, त्यामुळे सोने-चांदी आता सर्वसामान्यांच्या आवक्याबाहेर गेले होते. पण नवनवीन रेकॉर्ड करणारे दोन्ही मौल्यवान धातून पुन्हा एकदा स्वस्त झाले आहे.
सोने-चांदी झाले स्वस्त
एमसीएक्स आणि आंतरराष्ट्रीय बाजारपेठेतील सोन्या-चांदीचे दर करमुक्त आहेत, त्यामुळे देशातील बाजारपेठेतील दरांमध्ये तफावत असेल. इंडियन बुलियन अँड ज्वैलर्स असोसिएशन म्हणजे ibja शनिवार-रविवार आणि केंद्र सरकारने जाहीर केलेल्या सुट्यांच्या दिवशी सोने-चांदीचे भाव जाहीर करत नाही, त्यामुळे आज देशभरात सोने-चांदीचे भाव जाहीर होत नाहीत. लक्षणीय आहे की चालू आठवड्यात सोन्याच्या प्रतितोळा भावात तब्बल एक हजार रुपयांची घसरण झाली असून चांदी ३००० रुपयांनी स्वस्त झाले आहे. यंदाच्या आठवड्यात सोन्याची किंमत झरझर खाली आली असली तरी चांदीच्या दरात चढउतार सुरू राहिले.
या कारणांमुळे जगातली सर्वाधिक सोने खरेदी भारतात होते
दरम्यान, २३ जून रोजी २४ कॅरेट सोने ५८,३९५ रुपये तर २२ कॅरेट सोने ५३,४९० रुपये आणि १८ कॅरेट ४३,७९६ रुपये प्रति १० ग्रॅमवर पोहचले. तसेच चांदीच्या दरात जवळपास दोन हजारांची घसरण होऊन शुक्रवारी एक किलो चांदीचा भाव ६८,३०४ रुपये होता. लक्षात घ्या की वायदे बाजारात आणि आंतरराष्ट्रीय बाजारात सोने-चांदीवर कोणतेही कर, शुल्क लागू होत नाही तर सराफा बाजारात शुल्क आणि कराचा समावेश होत असल्यामुळे भावात तफावत दिसून येते.