महाराष्ट्र २४ । विशेष प्रतिनिधी । दि. ३१ जुलै । पंतप्रधान नरेंद्र मोदी यांच्या येत्या मंगळवारच्या (१ ऑगस्ट) दौऱ्याला जेमतेम २४ तासांचा अवधी असतानाही नेमके कोणते रस्ते केव्हा बंद राहणार? या परिसरातील शाळा-आस्थापना आणि दुकाने सुरू राहणार की बंद, याबाबत पोलिस यंत्रणा आणि जिल्हा प्रशासनाने कोणतेही स्पष्टीकरण दिलेले नाही. सकाळी सहापासून दुपारी तीनपर्यंत आवश्यकतेनुसार रस्ते बंद राहतील, अशा पोलिसांच्या मोघम आदेशामुळे मंगळवारी शाळा-महाविद्यालयांमध्ये, नोकरीसाठी बाहेर पडायचे की नाही, याबाबत पुणेकरांमध्ये प्रचंड संभ्रम आहे. विशेषत: मध्य वस्तीत बहुसंख्य शाळा या सकाळ-दुपारच्या असल्याने स्कूल व्हॅन, रिक्षाने येणारे विद्यार्थी अडकून पडणार का, अशी भीती पालकांमध्ये आहे.
पंतप्रधान नरेंद्र मोदी येत्या मंगळवारी (एक ऑगस्ट) टिळक पुरस्कारासह विविध प्रकल्पांच्या उद्घाटन-भूमिपूजनासाठी पुणे दौऱ्यावर येत आहेत. या वेळी सकाळी दहा ते दुपारी अडीच या वेळेत पंतप्रधान पुण्यात असणार आहेत. मोदी पुण्यात आल्यानंतर त्यांचा वाहन ताफा विद्यापीठ रस्ता, शिवाजी रस्ता, टिळक रस्ता, नामदार गोपाळ कृष्ण गोखले रस्ता आदी रस्त्याने जाणार आहे. मेट्रोच्या पहिल्या टप्प्याचे उद्घाटन मोदी यांच्या हस्ते झाले. त्या वेळी मोदी यांच्या कार्यक्रमाचे ठिकाण आणि प्रवासाच्या मार्गावरील दुकाने बंद ठेवण्यास सांगितले गेले होते. त्यावरून नागरिकांनी नाराजी व्यक्त केली होती. मात्र, आता मोदी यांचा दौरा अवघ्या २४ तासांवर येऊन ठेपला असून, अद्याप पोलिसांकडून कोणतेही चित्र स्पष्ट करण्यात आलेले नाही. त्यामुळे गोंधळाचे वातावरण निर्माण आहे. दरम्यान, या बाबत परिमंडळ एकचे उपायुक्त संदीपसिंग गिल यांच्याकडे विचारणा केली असता, त्यांच्याकडून स्पष्ट माहिती मिळाली नाही. जिल्हा प्रशासनाकडे विचारणा करून त्याबाबतची अधिक माहिती दिली जाईल, असे त्यांनी सांगितले.
शाळांबाबत अनिश्चितता
– बाजीराव रस्ता, टिळक रस्ता, लक्ष्मी रस्ता परिसरात अनेक प्राथमिक आणि उच्च माध्यमिक शाळा आहेत. या शाळांतील विद्यार्थ्यांची वाहतूक करणारी असंख्य वाहने टिळक रस्ता, शिवाजी रस्ता आणि लक्ष्मी रस्त्याने ये-जा करतात.
– वाहतूक पोलिसांनी आवश्यकतेनुसार सकाळी सहापासून रस्ते बंद करण्यात येतील, असे जाहीर केले आहे. मात्र, कोणते रस्ते केव्हा बंद राहणार, हे स्पष्ट केलेले नाही. त्यामुळे या रस्त्यांवरून शालेय विद्यार्थ्यांची वाहतूक कशी होणार, असा प्रश्न उपस्थित होत आहे.
– शाळा सुरू राहणार की बंद ठेवायच्या याबाबत जिल्हा प्रशासनाने शाळा व्यवस्थापनांना कोणतीही कल्पना दिलेली नाही. मोदी यांच्या दौऱ्यादरम्यान सुरक्षेसाठी घेण्यात येणारी खबरदारी पाहता अनेक शाळांनी त्या दिवशी ऑनलाइन शाळा घेण्याचे नियोजन केले आहे.
– दहावीच्या पुरवणी परीक्षाही काही केंद्रांवर मंगळवारी नियोजित आहेत, याबाबत सरकारी यंत्रणांशी योग्य तो समन्वय साधून विद्यार्थ्यांची गैरसोय होणार नाही, याची खबरदारी घेतली जाईल, असे आश्वासन राज्य मंडळाच्या वतीने देण्यात आले.
सकाळी सहापासून रस्ते बंद?
आचार्य आनंदऋषिजी चौक (पुणे विद्यापीठ चौक), भाऊसाहेब खुडे चौक (सिमला ऑफिस चौक), नेताजी सुभाषचंद्र बोस चौक (संचेती हॉस्पिटल), स. गो. बर्वे चौक, गाडगीळ पुतळा चौक, बुधवार चौक, सेवासदन चौक, टिळक चौक, अलका थिएटर, टिळक रस्ता, जेधे चौक, गोपाळ कृष्ण गोखले रस्ता, संगमवाडी रस्ता, सादलबाबा चौक, गोल्फ क्लब चौक, विमानतळ रस्ता असे रस्ते सकाळी सहा ते दुपारी तीनपर्यंत बंद राहतील, असे वाहतूक पोलिसांनी कळविले आहे. पुण्यातील बहुसंख्य वाहतूक याच रस्त्यांवरून होते. त्यामुळे पुणेकरांनी घराबाहेरच पडायचे नाही का? अशी विचारणा केली जात आहे.