महाराष्ट्र २४ । विशेष प्रतिनिधी । दि. १३ ऑगस्ट । आज राज्याचे उपमुख्यमंत्री देवेंद्र फडणवीस आणि राष्ट्रवादी काँग्रेसचे प्रमुख शरद पवार हे एकाच मंचावर येणार आहेत. शेतकरी कामगार पक्षाचे दिवंगत नेते व सांगोल्याचे आमदार राहिलेले भाई गणपतराव देशमुख यांच्या स्मारकाचे अनावरण आज होणार आहे. या कार्यक्रमाच्या निमित्ताने सध्या तरी एकमेकांच्या विरोधात असलेले हे नेते एकत्र येत आहेत.
यावेळी दोघेच आमने-सामने
राष्ट्रवादी काँग्रेसच्या फुटीनंतर शरद पवार आणि उपमुख्यमंत्री देवेंद्र फडणवीस हे प्रथमच दोघेच आमने-सामने दिसणार आहेत. यापूर्वी पुण्यातील पंतप्रधान नरेंद्र मोदी यांच्या कार्यक्रमात हे दोन्ही नेते एकाच मंचावर होते. मात्र, यावेळी पंतप्रधानांसोबत राज्याचे राज्यपाल, मुख्यमंत्री एकनाथ शिंदे, अजित पवार वगैरे सर्वचजण उपस्थित असल्याने या शासकीय कार्यक्रमात टोलेबाजी पाहायला मिळाली नव्हती. त्यामुळे आजच्या कार्यक्रमात दोघेही काय बोलणार? याकडे महाराष्ट्राचे लक्ष लागले आहे.
पहाटेच्या शपथविधीवरून आरोप-प्रत्यारोप
उपमुख्यमंत्री देवेंद्र फडणवीस हे दुपारी 12 वाजता सोलापूर विमानतळावर येतील. तेथून ते सांगोल्याला रवाना होतील. माजी मंत्री गणपतराव देशमुख यांच्या पुतळा अनावरण कार्यक्रमास उपस्थित राहणार आहेत. त्यानंतर सायंकाळी 4 वाजता सोलापुरातून मुंबईला रवाना होतील. दिवंगत गणपतराव देशमुख यांच्या पुतळ्याच्या अनावरण कार्यक्रमात हे दोन नेते आमने सामने येणार असल्याने पहाटेच्या शपथविधीबाबत दोघात रंगलेले आरोप-प्रत्यारोप पुन्हा दिसणार का? याची उत्सुकता आहे.