महाराष्ट्र २४ ।। विशेष प्रतिनिधी ।। दि. २८ ऑगस्ट ।। जुनी व कालबाह्य झालेली वाहने भंगारात काढून त्याबदल्यात नवे वाहन खरेदी करण्याची तयारी असलेल्या ग्राहकांना या नव्या वाहनखरेदीवर १.५ टक्के ते ३ टक्के सवलत देण्यास वाहन कंपन्या तयार असल्याची माहिती केंद्रीय मंत्री नितीन गडकरी यांनी मंगळवारी दिली.
गडकरी यांनी भारतीय वाहन उत्पादकांची मध्यवर्ती संघटना असलेल्या सियामच्या शिष्टमंडळासमवेत भारत मंडपम येथे मंगळवारी एक बैठक घेतली. यावेळी मंत्रिमहोदयांनी वाहन उत्पादकांपुढील प्रश्न व समस्या समजून घेतल्या. चक्रीय अर्थव्यवस्था आणि वाहनांचे आधुनिकीकरण या दोन्हींविषयी गडकरी यांनी सकारात्मक भूमिका घेतली. चक्रीय अर्थव्.वस्थेचे महत्त्व ओळखून तिला गती देण्यासाठी विविध प्रकारची व्यावसायिक वाहनांची निर्मिती करणाऱ्या आणि विविध प्रकारच्या प्रवासी वाहनांची निर्मिती करणाऱ्या कंपन्यांनी मर्यादित काळासाठी वाहनखरेदीवर सवलती देण्याची तयारी दर्शवली. परंतु अशी सवलत वाहन भंगारात काढणाऱ्या व तसे प्रमाणपत्र दाखवून नवे वाहन खरेदी करू इच्छिणाऱ्या ग्राहकांनाच दिली जाईल, असेही या बैठकीत ठरले. ही माहिती या बैठकीनंतर प्रसिद्ध झालेल्या अधिकृत निवेदनात देण्यात आली आहे.
व्यावसायिक वाहनांची निर्मिती करणाऱ्या कंपन्यांनी मर्यादित काळासाठी सवलत देण्याची तयारी दाखवली आहे. ही सवलत अवजड वाहने भंगारात काढून त्याजागी नवे वाहन खरेदी करणाऱ्या मालवाहतूकदारांना दोन वर्षांसाठी देण्यात येणार आहे. त्याचप्रमाणे जुने झालेले प्रवासी वाहन भंगारात काढून त्याजागी नवे प्रवासी वाहन खरेदी करणाऱ्याला एक वर्षासाठी अशी सवलत मिळणार आहे. या सवलतींमुळे विशिष्ट कालावधीनंतर जुन्या झालेल्या वाहनांना भंगारात टाकण्यासाठी लोक स्वतःहून पुढे येतील. यामुळे सुरक्षित, प्रदूषणमुक्त आणि सक्षम वाहने रस्त्यांवर धावतील, याकडे वरील निवेदनात लक्ष वेधण्यात आले आहे.
या बैठकीला सियामचे अध्यक्ष विनोद अगरवाल, मारुती सुझुकी इंडियाचे एमडी व सीईओ हिसाशी ताकेउची, टाटा मोटर्सचे कार्यकारी संचालक गिरीश वाघ, अशोक लेलँडचे एमडी व सीईओ शेनू अगरवाल आणि टीव्हीएस मोटरचे सीईओ के.एन. राधाकृष्णन आदी उपस्थित होते.
…अशी वाहने अशा सवलती
-मारुती सुझुकी इंडिया, टाटा मोटर्स, महिंद्र अँड महिंद्र, ह्युंदाई मोटर इंडिया, किया मोटर्स, टोयोटा किर्लोस्कर मोटर, होंडा कार्स, जेअसडब्ल्यू एमजी मोटर, रेनॉ इंडिया, निस्सान इंडिया आणि स्कोडा फोक्सवॅगन इंडिया यांनी नव्या कारच्या एक्स-शोरूम किंमतीवर १.५ टक्के किंवा २० हजार रुपये यापैकी जी रक्कम कमी असेल ती सवलत देण्याची तयारी दाखवली आहे.
-वाहनमालकाने मागील सहा महिन्यांत भंगारात काढलेल्या वाहनांच्या बदल्यात नवे वाहन खरेदी करण्याची तयारी दाखवल्यास या कंपन्यांकडून ही सवलत दिली जाणार आहे.
ITR Processing: आयटीआर प्रक्रियेसाठी किती वेळ लागतो, प्रक्रियेनंतर किती दिवसांनी परतावा मिळतो? जाणून घ्या
-मर्सिडिझ बेन्झ इंडियाने २५ हजार रुपये सूट देण्याचे जाहीर केले आहे. ही सूट कंपनीच्या विविध कार मॉडेल्सवर सध्या दिल्या जाणाऱ्या सवलतीपेक्षा अतिरिक्त असणार आहे.
-जुने झाल्यामुळे भंगारात काढलेल्या वाहनाची माहिती वाहन प्रणालीशी जोडलेली असणार आहे.
-वाहन कंपन्यांना वाहनांच्या विशिष्ट मॉडेल्ससाठी अतिरिक्त सवलत द्यायची झाल्यास तशी मुभा असणार आहे.
-टाटा मोटर्स, व्होल्व्हो आयशर कमर्शियल वेहिकल्स, अशोक लेलँड, महिंद्र अँड महिंद्र, फोर्स मोटर्स, इसुझू मोटर्स आणि एसएमएल इसुझू या व्यावसायिक वाहनांची निर्मिती करणाऱ्या कंपन्या ३.५ टनाहून अधिक वजन वाहणाऱ्या व्यावसायिक मालवाहतूक वाहनांसाठी एक्स-शोरूम किंमतीवर ३ टक्के सवलत देणार आहेत.