महाराष्ट्र २४ ।। विशेष प्रतिनिधी ।। दि. १९ ऑक्टोबर ।। भारतविरुद्ध न्यूझीलंड यांच्यात तीन सामन्यांची कसोटी मालिका खेळवली जात आहे. मालिकेतील पहिला सामना हा बेंगळुरुच्या चिन्नास्वामी स्टेडियमवर रंगत आहे. मालिकेतील पहिला दिवस हा पावसामुळे वाहून गेल्यानंतर दुसऱ्या दिवशी नाणेफेक झाली आहे. भारताच्या बाजूने कौल पडला पण भारताचा पहिला डाव चांगला झाला नाही. दुसऱ्या डावात मात्र भारताने आपली कामगिरी दमदार सुरु ठेवली. मालिकेच्या चौथ्या दिवसी भारताच्या सर्फराजने शतक ठोकले.
बेंगळुरू कसोटीच्या पहिल्या डावात 46 धावांत संघ आटोपल्यानंतर, टीम इंडियाकडून क्वचितच कोणी पुनरागमनाची अपेक्षा केली असेल. पण, आता सर्फराज खानच्या शतकाने आशेची ज्योत पुन्हा पेटवली आहे. सर्फराजने कसोटी कारकिर्दीतील पहिले शतक झळकावून न्यूझीलंडची झोप उडवली आहे. न्यूझीलंडने पहिल्या डावात भारताविरुद्ध 356 धावांची आघाडी घेतली होती. सर्फराजच्या शतकामुळे टीम इंडिया आता किवीजच्या त्या मोठ्या आघाडीतून सावरताना दिसत आहे.
सर्फराज खानने पहिले कसोटी शतक झळकावले
बेंगळुरू कसोटीत सर्फराज खानने 109 चेंडूत शतक पूर्ण केले. त्याने 13 चौकार आणि 3 षटकारांच्या मदतीने हे शतक पूर्ण केले. सर्फराज खानच्या कसोटी कारकिर्दीतील हे पहिले शतक आहे, ज्याची स्क्रिप्ट त्याने चौथ्या कसोटी सामन्यात लिहिली आहे. याआधी त्याच्या नावावर कसोटी क्रिकेटमध्ये 3 अर्धशतके आहेत. सर्फराज खान पहिल्या डावात शून्यावर बाद झाला. पण, तो दुसऱ्या डावात हिरो असल्याचे सिद्ध होत आहे. आता टीम इंडियाच्या आशा सर्फराजवर टेकल्या आहेत. सर्फराजला हेही माहीत असेल की अजून काम पूर्ण झालेले नाही. टीम इंडियाला विजयापर्यंत पोहोचवायचे असल्यास त्यांना पहिले कसोटी शतक आणखी मोठे करावे लागेल.