महाराष्ट्र २४ ।। विशेष प्रतिनिधी ।। दि. २ जानेवारी।। ‘एअर इंडिया’ने खासगीकरणानंतर खूप प्रगती केली असून, तिने सुरू केलेल्या आंतरराष्ट्रीय उड्डाणांमुळे येत्या काळात ही कंपनी अनेक देशांपर्यंत पोहोचेल,’ असा विश्वास ‘एअर इंडिया’चे अध्यक्ष कॅम्पबेल विल्सन यांनी बुधवारी व्यक्त केला. आंतरराष्ट्रीय स्तरावर कमी अंतरासाठी; तसेच देशांतर्गत सेवेसाठी कंपनी वापरत असलेल्या एकमार्गिका असणाऱ्या विमानांच्या देखभाल-दुरुस्तीचे काम हाती घेण्यात आले असून, ते चालू वर्षाच्या मध्यापर्यंत पूर्ण होईल, असेही विल्सन म्हणाले. विमानातून देशात प्रवास करताना इंटरनेट वापरणे आता शक्य होणार आहे. ‘एअर इंडिया’ने देशांतर्गत विमानप्रवासात वाय-फाय सुविधा देऊ केली असून, अशा प्रकारची सुविधा देणारी ही पहिली कंपनी ठरली आहे.
‘एअर इंडिया’ने एअरबस ए ३५० आणि बोइंग ७८७-९ या रुंद विमानांमध्ये वाय-फायची सुविधा देऊ केली आहे. देशांतर्गत आणि आंतरराष्ट्रीय विमानांसाठी ही सुविधा देण्यात येणार आहे. याखेरीज, एअरबस ए ३२१ निओ प्रकारच्या निवडक विमानांतूनही ही सुविधा प्रवाशांना दिली जाईल.
एअरबस ए ३५०, निवडक एअरबस ए ३२१ निओ आणि बोइंग बी७८७-९ या विमानांत आंतरराष्ट्रीय उड्डाणांदरम्यान वाय-फाय सुविधा देणे सध्या प्रायोगिक तत्त्वावर सुरू आहे. यामध्ये न्यूयॉर्क, लंडन, पॅरिस आणि सिंगापूर येथे जाणाऱ्या विमानांमध्ये ही सेवा सध्या दिली जात आहे. देशांतर्गत विमान प्रवासात वाय-फाय सुविधा देणे हा याचाच एक भाग असणार आहे, ‘एअर इंडिया’ने म्हटले आहे.
इथे मिळणार वाय-फाय
‘एअर इंडिया’च्या विमान उड्डाणादरम्यान दहा हजार फुटांच्या वर गेल्यानंतर वाय-फाय सुविधा मिळू लागेल. आयओएस आणि अँड्रॉइड प्रणाली असलेल्या लॅपटॉप, टॅबलेट व स्मार्टफोन यांच्यासाठी ही सुविधा विमानात वापरता येईल. त्याचप्रमाणे ही सुविधा एकाच वेळी अनेक उपकरणांसाठीही वापरता येणार आहे.