महाराष्ट्र २४ ।। विशेष प्रतिनिधी ।। दि.२४ जानेवारी ।। पुणे शहरात गुन्हेगारी वाढत असताना नेत्यांच्या वर्चस्वामुळे अनेक घटना समोर येत आहेत. याबाबत सर्वसामान्य नागरिक संताप व्यक्त करत आहेत. परंतु पोलिसांनाही गुन्हेगारांवर आळा घालण्यात अपेक्षित यश मिळत नाहीये. आता लोकप्रतिनिधींच्या मुलांची रस्त्यावर थेट मुजोरी पाहायला मिळत आहे. पुण्याचे माजी उपमहापौर आबा बागुल यांचा मुलगा हेंमत बागुल यांनी एका सर्वसामान्य नागरिकाला किरकोळ कारणावरून मारहाण केली आणि गोळी घालण्याची धमकी दिली. हा सर्व प्रकार बंद गार्डन पोलीस स्टेशनच्या हद्दीत घडला असून याचा सीसीटीव्ही फुटेज समोर आला आहे. या प्रकरणी बंद गार्डन पोलीस स्टेशनमध्ये हेमंत बागुल यांच्या विरोधात २१ जानेवारी रोजी गुन्हा दाखल करण्यात आला आहे. फिर्यादी फय्याज सय्यद यांनी तक्रार दिली असून, त्यांनी घटनेचा सविस्तर तपशील दिला आहे.
पीडित युवकाचे म्हणणे
पुण्यातील मंगळवार पेठेतील जुना बाजार येथे एचपी पेट्रोल पंपाजवळ प्रवास करत असताना लाल रंगाच्या स्विफ्ट गाडीचा दरवाजा अचानक उघडला. त्यामुळे माझी गाडी बॅलेन्स गमावून शेजारी असलेल्या काळ्या रंगाच्या ग्लोस्टर गाडीला धडकली. त्यानंतर, स्विफ्ट गाडीतील हेमंत बागुल गाडीतून उतरले आणि मला कानशिलात मारली. मी तक्रार देण्यासाठी बंद गार्डन पोलीस स्टेशनकडे निघालो असताना, हेमंत बागुल यांनी मला धमकी दिली की, “पोलीस स्टेशनला पोहोचण्याआधीच गोळी तुझ्यापर्यंत पोहोचेल, आणि तुझ्या घरच्यांनाही बॉडी सापडणार नाही.” तक्रार दिल्यानंतर हेमंत बागुल यांनीही माझ्यावर क्रॉस कंप्लेंट दाखल करत, मी त्यांना मारहाण केल्याचा दावा केला आहे. मात्र, व्हिडिओ फुटेज हाती लागल्यानंतर मी पोलीस आयुक्तांची भेट घेतली. त्यांनी या घटनेची चौकशी करून न्याय देण्याचे आश्वासन दिले आहे. बीडमध्ये जे संतोष देशमुख प्रकरण घडले, तसे पुण्यात होऊ नये, आणि मला न्याय मिळावा, हीच माझी विनंती असल्याचं पीडित युवकांचं म्हटलं आहे.
पुणे महापालिकेचे माजी उपमहापौर आबा बागुल यांचे मुलगा हेंमत बागुल यांची रस्त्यावर तरूणाला मारहाण, CCTV फुटेज व्हायरल #Pune #Punenews #viralvideo #aababagul #CCTV pic.twitter.com/N8LcLwnokE
— Harish Malusare (@harish_malusare) January 24, 2025
आर्थिक लाभापोटी खटाटोप- हेमंत बागुल
वास्तविक माझे वाहन सिग्नल लागल्याने थांबलले असताना वाहतूक नियमांचे उल्लंघन करून डाव्या बाजूने ओव्हरटेक करून त्या व्यक्तीने माझ्या वाहनाला पाठीमागून धडक दिली. त्यातून त्याला जाब विचारला असता ,तो अरेरावी, दादागिरी इतकेच काय शिवीगाळही करत होता.त्यातून हे घडले. ज्यावेळी त्याला कळले की मी आबा बागुल यांचा मुलगा आहे .त्यामुळे त्याने प्रसिद्धीपोटी किंवा प्रतिमा मलीन करण्यासह आर्थिक लाभापोटी या हेतूने केलेला हा खटाटोप आहे. त्यामुळे माझी माध्यमांना विनंती आहे की या प्रकाराला नाहक प्रसिद्धी देऊ नये, असं हेमंत आबा बागुल यांनी पोस्ट करत म्हटलं आहे.